Xitay uniwérsitétliri dunyaning arqida qalmaqta

Xitay hökümet da'irilirining ashkarilishiche, yéqinda xitaydiki melum bir tetqiqat orgini dunyadiki 100 chong birinchi derijilik mektepler tizimlikini élan qilghan. Lékin xitaydiki héchqandaq mektep tizimliktiki bu 100 mektepning ichige kirelmigen. Közetküchiler "ilmiy tetqiqat erkinlikimu bolmighan muhit astida, xitay uniwérsitétlirining dunyadiki birinchi derijilik mektepler arisigha kirelishi hergizmu mumkin emes" dep bildürmekte.

Yéqinqi yillardin buyan, xitayning béyjing we shangxey qatarliq sheherliride, bir qisim aliy mektep rehberliri "qisqa waqit ichide, dunya sewiyisige yétishimiz" dep dunyadiki we shundaqla xitaydiki dangliq mekteplerni tizip chiqip, bu heqte türlük pa'aliyetlerni élip barghan. Lékin közetküchiler "bundaq qilish arqiliq dunyaning aldigha ötimiz dégenlik bekmu nadanliq. Hazirqi mesile xitaydiki herqandaq aliy mektepning ilmiy tetqiqat saheside qilche erkinlik yoq, ilim ‏- pen igiliri üchün erkin sözlesh, erkin yézish we erkin tetqiqat qilish imkaniyiti bolmighan shara'itta, qandaqmu dunyaning aldigha ötüsh mumkinchiliki bolsun! ‏- dep körsetmekte.

Munasiwetlik matiriyallardin melum bolushiche, hazir xitaydiki herqandaq aliy mektep oqutush matériyalliri hetta oqutquchilarning ilmiy maqaliliri 4 chong asasiy prinsipni birinchi orun'gha qoyidiken , yeni kompartiyining rehberlikini, sotsiyalizmni , markisizm , léninizm we maw zédong idiyisi we shundaqla prolétariyat diktatorisi dégendeklerni birinchi orun'gha qoyup, oqutush matériyal we ilmiy maqalilarni shu asasta neshr qilidiken. (Méhriban)