Amérika ‏ - xitay kishilik hoquq söhbiti ünümlük netije bermidi

 Amérika tashqi ishlar ministirliqining démokratiye, kishilik hoquq we emgek ishlirigha mes'ul yardemchi minstiri déwid krémer düshenbe küni béyjingda muxbirlargha bergen bayanatida, xitay rehberliri bilen élip barghan söhbiti jeryanida, nurghunlighan mesililerni otturigha qoyghanliqini bildürdi. Lékin u xitay terep bilen élip bérilghan söhbetlerni ümidwar yaki ümidsiz dep teswirliyelmeydighanliqini tekitlep, kélerki heptiler we aylar ichide yüz béridighan weqeler néme bolidighanliqini körsitidu, dédi.

Amérika birleshme agéntliqining xewer qilishiche, bu qétimqi amérika - xitay kishilik hoquq söhbitide, xitay üchün nahayiti sezgür mesililer hésablan'ghan, tibet we Uyghurlarning weziyiti, diniy erkinlik hemde xitaydiki siyasiy mehbuslar mesilisi qatarliq mesililer muzakire qilin'ghan.

Amérika tashqi ishlar yardemchi minstiri déwid krémer, xitay sepirining harpisida, dunya Uyghur qurultiyi we Uyghur amérika birleshmisining mes'ulliri bilen bir nechche qétim uchriship, ulardin Uyghurlarning nöwettiki ehwali heqqide melumat alghan hemde xitay hökümiti bilen élip bérilidighan söhbetlerde Uyghurlar mesilisining we ularning teleplirining choqum otturigha qoyulidighanliqini bildürgen.

Xitay amérika otturisidiki kishilik hoquq söhbiti 2002‏ - yili üzülüp qalghan idi. Amérika tashqi ishlar yardemchi ministirining éytishiche, prézidént bush hökümiti, xitay bilen élip bérilidighan söhbetlerning netije bermeydighanliqini oylap, bu söhbetlerni bikar qiliwetken iken. Lékin ötken yili bu söhbetlerni qaytidin bashlashni qarar qilghan.