Xitay özining térrorluq heriketlerge qattiq zerbe béridighanliqini yene bir qétim jakarlidi

Uyghur élidiki jama'et xewpsizlik nazariti jüme küni Uyghur élining pakistan chégrisi yéqinidiki taghliq rayonda, 18 neper térror gumandarining xitay saqchiliri teripidin öltürülüp, 17 kishining tutulghanliqini jakarlighan haman, xitay jama'et xewpsizlik ministirliqi seyshenbe küni bayanat élan qilip, özining xelq'ara bilen bolghan hemkarliqini kücheytip, herqandaq térrorluq teshkilat we térrorluq heriketlerge qattiq zerbe béridighanliqini bildürdi.

Xitay jama'et xewpsizlik ministirliqining bayanatchisi wu xéping térror gumandarlirigha qilghan hujum jeryanini sözlep kélip, mezkur délo heqqide dawamliq tekshürüsh élip bériwatqanliqini melum qildi.

Dunya Uyghur qurultiyining bayanatchisi dilshat rishit ependi özining Uyghur élide yüz bergen mezkur weqedin qattiq ejeplen'genlikini we échinidighanliqini bildürüp, "mezkur weqening yüz bérishi xitay hökümitining Uyghur élide élip bériwatqan zorawanliq tüzümidin kélip chiqqan. Xitay hökümitining Uyghur élide yürgüzüwatqan bolmighur siyasiti bir qisim Uyghurlarning qoral kötürüp chiqishigha sewebchi boldi" dep körsetti. Emma u yene "belkim mezkur weqeni xitay hökümiti özi oydurup chiqarghan bolushi mumkin" dep bildürdi. (Méhriban)