Birleshken döletler teshkilati xitayning gherbidiki namrat rayonlarning muhitini yaxshilash üchün qedem tashlidi

Birleshken döletler teshkilati yéqinda, xitayning gherbidiki namrat rayonlarning muhitini yaxshilash üchün, deslepki qedemde 1 milyon 700 ming amérika dolliri ajritidighanliqini bildürdi.

Birleshken döletler teshkilatining tereqqiyat pilan kométitining muhitni yaxshilash üchün élip baridighan xizmitining meqsidi, bundin kéyinki üch yil ichide xitayning gherbidiki 12 ölkide, mexsus ish béjirish ponkitliri qurup, pütün yer shari kilimatida yüz bériwatqan özgirishning aldini élishni kücheytishtin ibaret iken.

Nöwette, xelq'aradiki mütexessisler, xitayning muhit mesilisige köngül bölmeywatqanliqini qattiq tenqid qilip, xitayning iqtisadni tereqqi qildurush bilen birge muhit mesilisgimu alahide ehmiyet bérishini telep qilmaqta. Mütexessislerning bildürüshiche, xitayda her heptide, kömür yéqilghusi bilen heriketlendürülidighan éléktir istansisidin biri qurulidiken. Bu xitayda muhitni éghir derijide bulghaydighan asasliq amilardin biri hésablinidu.

Uyghur éli, xitaydiki muhiti éghir derijide bulghan'ghan asasliq rayonlarning biri bolup, Uyghurlar birleshken döletler teshkilatining muhit mesilisini yaxshilash üchün élip bériwatqan mezkür qedimining Uyghur élidiki muhit bulghinishi mesilisining yaxshilinishigha yardem körsitishidin ümid kütmekte.

Xitayning Uyghur élide ashkare we yoshurun élip barghan atom sinaqliri we échish xaraktiridiki pilansiz kan , quduq qézishliri mezkür rayon muhitigha tesir körsitipla qalmay, bu zéminda yashawatqan xelqning türlük saqaymas késellerge giriptar bolushini meydan'gha keltürmekte . (Eqide)