بېيجىڭ ساقچىلىرى ئەركىن قەلەمكەشلەر جەمئىيىتىنىڭ يىغىلىشىنى باسىتۇرۇشى مۇمكىن
2007.12.21
خىتاي كىشىلىك ھوقۇق قوغدىغۇچىلىرى تەشكىلاتىنىڭ خەۋەر قىلىشىغا قارىغاندا، 19- دېكابىر شاڭخەي شەھەرلىك بىخەتەرلىك ئىدارىسى پۇدۇڭ رايونلۇق تارمىقىنىڭ مەخپىي خادىملىرى، شاڭخەيلىك يازغۇچى ۋە كىشىلىك ھوقۇق پائالىيەتچىسى لى جيەنخۇڭنى نەزەربەند ئاستىغا ئالغان.
شاڭخەي مەخپىي ساقچىلىرىنىڭ لى خانىمغا بىلدۈرۈشىچە، ساقچىلار ئۇنىڭ 22- دېكابىر بېيجىڭدا ئېلىپ بېرىلىدىغان خىتاي ئەركىن قەلەمكەشلەر يىغىلىشىغا قاتنىشىشىنىڭ ئالدىنى ئېلىش ئۈچۈن ئۇنى قولغا ئالغان ئىكەن.
خەۋەردە كۆرسىتىلىشىچە، لى خانىم 14- دېكابىردىن باشلاپ كەينىگە ئادەم چۈشكەنلىكىنى بايقىغان. 15- دېكابىر ئۇ ساقچىلارنى ئېزىقتۇرۇش ئۈچۈن دوستىنىڭ ئۆيىدە قونۇپ قالغان ھەمدە مۇشۇ ھەپتىدە ئوي كۆچۈشنى پىلان قىلغان بولسىمۇ، 18- دېكابىر مۇناسىۋەتلىك بەزى ئىشلارنى بىر ياقىلىق قىلىش ئۈچۈن ئۆز ئۆيىگە قايتقان.
شۇ كۈنى كەچقۇرۇن بىر بۆلەك پۇقراچە كىيىنگەن ساقچىلار لى خانىمنىڭ ئۆيىگە بېسىپ كىرىپ ئۇنى ئۆيىدە نەزەر بەند ئاستىغا ئالغان ۋە 19- دېكابىر لى خانىم ۋە ئۇنىڭ دادىسىنى ساقچىخانىغا ئېلىپ كەتكەن.
خەۋەردە كۆرسىتىلىشىچە، لى خانىم ھازىر بىر مېھمانخانىدا نەزەر بەند ئاستىدا ياتماقتا ئىكەن. ساقچىلارنىڭ ئۇنىڭغا ئېيتقانلىرىغا قارىغاندا، ئۇنىڭ قولغا ئېلىنىشى بېيجىڭدىكى دۆلەت بىخەتەرلىك تارماقلىرىنىڭ بۇيرۇقى بىلەن ئېلىپ بېرىلغان بولۇپ، ئۇ 25- دېكابىرغىچە قويۇپ بېرىلمەيدىكەن.
ساقچىلارنىڭ ئېيتىشىچە يەنە، بېيجىڭ ساقچىلىرى 22- دېكابىر ئېلىپ بېرىلىدىغان ئەركىن قەلەمكەشلەر جەمئىيىتىنىڭ يىغىلىشىنىمۇ بېسىقتۇرۇشى مۇمكىن ئىكەن. (جۈمە)
مۇناسىۋەتلىك ماقالىلار
- خىتاي ساقچىلىرى نامايىشچىلارغا ياش ئاقتۇرۇش بومبىسى ئاتتى
- يېقىندىن بۇيان خىتاينىڭ كىشىلىك ھوقۇق خاتىرىسى، ئادەتتىن تاشقىرى دىققەتكە سازاۋەر بولماقتا
- خىتايدا ھۆكۈمەتكە قارشى نارازىلىق ھەرىكەتلىرى ئىزچىل تۈردە يۈز بەرمەكتە
- خەلقئارا ساقچى: تېررورچىلار بېيجىڭ ئولىمپىك يىغىنىغا ھۇجۇم قىلىشنى پىلانلىغان بولۇشى مۇمكىن
- خىتاينىڭ ئولىمپىك ھارپىسىدىمۇ كىشىلىك ھوقۇقنى داۋاملىق دەپسەندە قىلىۋاتقانلىقى ئاشكارىلانماقتا
- كىشىلىك ھوقۇق تەشكىلاتى: خىتاي مەكتەپلىرىدە ئۆسمۈرلەرنى ئەمگەككە ئېلىش ئىشلىرى مەۋجۇت
- خىتاي "قانۇن تەشۋىقات كۈنى" ھارپىسىدا نامايىشچىلارنىڭ نارازىلىقىغا دۇچ كەلدى
- خەلقئارا مۇخبىرلار تەشكىلاتى ئولىمپىك كومىتېتىنى خىتاي مەسىلىسىدە ئەيىبلىدى
- خىتاينىڭ ئەنخۇي ئۆلكىسىدە ھەربىي ئاكادېمىيە ئوقۇغۇچىلىرى ئىسيان كۆتەردى