"Döletni parchilashqa qarshi turush qanuni" ni Uyghur ilida tedbiqlash otturigha qoyuldi

Uyghur aptonom rayoni partkomining da'imiy ezasi, siyasi - qanun komitétining sékritari xo chang'en, Uyghur aptonom rayonining qanun sépidiki zatlar bilen aldinqi küni ötküzgen söhbet yighinida, "döletni parchilashqa qarshi turush qanuni" ni Uyghur aptonom rayonining emeliy ehwali bilen zich birleshtürüshke chaqirdi.

Xo chang'en, "döletni parchilashqa qarshi turush qanunini shinjangning emeliy ehwali bilen zich birleshtürüp, döletning igilik hoquqi we zémin pütünlikini qanun bilen qoghdash, döletning birliki we milletler ittipaqliqi tonushini kücheytip, milliy bölgünchilerge zerbe bérish", dep tekitligen. Uning tekitlishiche," döletni parchilashqa qarshi turush qanuni" ning Uyghur aptonom rayonidiki ijtima'iy muqimliqni pütün küch bilen qoghdashda, muhim ri'al ehmiyiti bar iken.

Aptonom rayon partkomining zuwani "shinjang géziti" , xo chang'enning qanun da'ilirini Uyghur aptonom rayonidiki atalmish bölgünchiler, diniy radikal küchler shundaqla térorchilargha téximu qattiq zerbe bérishke chaqirghanliqini xewer qildi.

Béyjing hökümiti bu yil 3 - ayda xitay xelq qurultiyining memliketlik yighinida maqullan'ghan "döletni parchilashqa qarshi turush qanuni" ning teywen'ge qaritilghanliqini jakarlighan idi. Amma xo chang'en, mezkur qanunni "shinjangning emeliy ehwali bilen zich birleshtürüsh" ke chaqirghan.

Xo chang'enning chaqiriqi merkizi gérmaniyidiki dunya Uyghur qurultiyining tenqidige uchridi. Qurultay bayanatchisi dilshad rishid, "sherqiy türkistan bilen xitay otturisidiki mesile, bölünüsh yaki birlikke kélish mesilisi emes. Bu, mustemlike qilish bilen mustemlike qilinish mesilisi," dep körsetti. Dilshad rishid, xitay hökümiti Uyghurlarni basturush herikitini qanunlashturmaqta, dep eyiplidi. (Erkin)