Християн мухлиси уйғур елидә бихәтәрлик хадимлири тәрипидин уруп яриландурулди‎

Уйғур елиниң қәшқәр вилайитидики християн мурити туң чимяв йеқинда диний етиқади ‎сәвәбидин йәрлик дөләт бихәтәрлик идариси хадимлири тәрипидин сораққа тартилип, уруп ‎яриландурулди.‎

Америкидики хитайға ярдәм бериш җәмийитиниң ашкарилишичә, қәшқәр вилайәтлик ‎дөләт бихәтәрлик идарисиниң хадимлири 9 - айниң ахирлири християн мурити туңни сораққа ‎тартип, униң қайси йәрдә диний йиғилиш өткүзидиғанлиқи, кимләр билән алақиси барлиқини ‎қистап сориған. Туң соаллириға җаваб бәрмигәнликтин, бихәтәрлик хадимлири уни уруп ‎мәйдә сөңикини сундуривәткән. ‎

Буниңдин сирт, униң яриси әслигә кәлмигән шараитта, у давалиниватқан қәшқәр иккинчи ‎хәлқ дохтурханиси униң дохтурханидин чиқип кетишини тәләп қилған. Униң қәшқәр җ х ‎идарисиға сунған әрзиму ақмиған. ‎

Шуниң билән бир вақитта, қәшқәр баҗ даирилири туң чимявни қәшқәрдики аилә җиһазилири ‎дукинини 14 - өктәбиргичә тақашқа буйриған. Униң дилоси чәтәл мәтбуатлириниң ‎диққитини тартқандин кейин, қәшқәр бихәтәрлик даирилири йәнә уни әзәлдин қийин- қистаққа ‎елинмиғанлиқ һәққидики бир тилхәткә қол қоюшқа мәҗбурлиған. ‎

Хитайға ярдәм бериш җәмийитидики бо шичув әпәндиниң билдүрүшичә, бу, хитай ‎һөкүмити бу йил 6 - айда йеңи диний ишлар низамнамисини йолға қойғандин буян, ‎уйғур елидә иккинчи қетим кәң көләмдә диндарларни ахтуруп тутқун қилип, мунасивәтлик ‎кишиләрни қийин - қистаққа алғанлиқиниң бир мисали икән. ‎

Нөвәттә хитайдики атақлиқ үч қануншунас өзликидин туң әпәндигә қануний җәһәттин ‎йитәкчилик қилидиғанлиқини билдүрмәктә. (Арзу)‎