Xitay kompartiyisi 16 - qurultiyining 5 - omumi yighini énérgiye krizisi muzakire qildi

Béyjingda chaqirilghan xitay kompartiyisi merkizi komitéti 16 - qurultiyining 5 - omumi yighini yekshenbe küni xitay duch kéliwatqan énérgiye krizisini hel qilish mesililiri boyiche muzakire élip barghan. Kelgüsi 5 yil ichide énérgiye importini kéngeytish, xitay shirketlirining chet'elde néfit, tebi'iy gaz we kan mehsulatlirigha meblegh sélishini qollashni otturigha qoyup, énérgiye yétishmeslik mesilisini hel qilish pilani maqullighan.

Nöwette xitay dunya boyiche amérikidin qalsa 2 - chong néfit istimal qilidighan döletke aylandi. Analizchilarning tekitlishiche, xitayning énérgiyige bolghan ihtiyajidiki éshish, néfit bahasining örlep kétishini keltürüp chiqarmaqta.

Xitay metbu'atlirida da'irilerning Uyghur aptonom rayonidiki énérgiye menbe'elirini échish pilani toghrisida toxtalmidi. Emma yighin bashlinishtin ilgiri xongkongda chiqidighan "wén xuy" géziti, kompartiye merkizi komitétining 11 - yilliq pilandiki énérgiye mesilisige da'ir bir doklatida, Uyghur aptonom rayoni xitayning tebi'iy menbe'eler bixeterliki rolini oynaydighan rayon, dep atighanliqini tekitligen.

"Wén xuy" gézitining eskertishiche, zéng chingxongningning Uyghur aptonom rayonidiki ziyariti xitayning énérgiye istratégiyisi bilen munasiwetlik iken. Zéng chingxong, xitayning gherbni échish istratégiyisi muhit qoghdighuchilar we Uyghur teshkilatlirining tenqidige uchrawatqan bir chaghda, "Uyghur aptonom rayoni jonggoning muhim istratégiyilik énérgiye bazisi bolup qalidu", dep tekitligen idi. (Erkin)