Фуҗйәндә 200 гә йеқин киши санаәт булғинишиға қарши наразилиқ билдүрди


2006.04.12

Йеқинда хитайниң фуҗйән өлкисидики бир санаәт районида олтуридиған 200 гә йеқин йеза пуқраси бу райондики санаәт булғинишиға қарши наразилиқ билдүрүп, әтраптики бир қанчә завутқа бесип киргән.

Бу йеза аһалилириниң билдүрүшичә, фуҗйәнниң чүәнҗов шәһиридики бир қанчә санаәт завутлиридин чиққан сесиқ пурақ вә керәксиз сулар йеза аһалилириниң турмушиға вә саламәтликикә еғир зиянларни елип кәлгән, һәтта деһқанчилиқ зираәтлирини вәйран қилип, белиқларниң өлүп кетишидәк ақивәтләрни пәйда қилған.

Бу 200 гә йеқин йеза аһалиси шәнбә күни қоллирида төмүр тоқмақларни көтирип бу завутларға бесип киргән һәмдә завут ичидики әслиһәләрни уруп чаққан. Шундақла бу қалаймиқанчилиқ йәрлик һөкүмәт хадимлири вә сақчилар йетип кәлгәндә андин бесиққан.

Хитайда мушуниңға охшаш санаәт булғинишиға қарши намайишлар йеқинқи бир нәччә йиллардин буян көп йүз бәрмәктә. Хитай һөкүмити болса йеза вә шәһәрләрдики турмуш сәвийисини яхшилайдиғанлиқини вәдә қилиш билән биргә, еғир булғиниш пәйда қиливатқан карханиларғиму зәрбә беридиғанлиқини тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.