Fujyende 200 ge yéqin kishi sana'et bulghinishigha qarshi naraziliq bildürdi

• 
  2006-04-12

Yéqinda xitayning fujyen ölkisidiki bir sana'et rayonida olturidighan 200 ge yéqin yéza puqrasi bu rayondiki sana'et bulghinishigha qarshi naraziliq bildürüp, etraptiki bir qanche zawutqa bésip kirgen.

Bu yéza ahalilirining bildürüshiche, fujyenning chüenjow shehiridiki bir qanche sana'et zawutliridin chiqqan sésiq puraq we kéreksiz sular yéza ahalilirining turmushigha we salametlikike éghir ziyanlarni élip kelgen, hetta déhqanchiliq zira'etlirini weyran qilip, béliqlarning ölüp kétishidek aqiwetlerni peyda qilghan.

Bu 200 ge yéqin yéza ahalisi shenbe küni qollirida tömür toqmaqlarni kötirip bu zawutlargha bésip kirgen hemde zawut ichidiki eslihelerni urup chaqqan. Shundaqla bu qalaymiqanchiliq yerlik hökümet xadimliri we saqchilar yétip kelgende andin bésiqqan.

Xitayda mushuninggha oxshash sana'et bulghinishigha qarshi namayishlar yéqinqi bir nechche yillardin buyan köp yüz bermekte. Xitay hökümiti bolsa yéza we sheherlerdiki turmush sewiyisini yaxshilaydighanliqini wede qilish bilen birge, éghir bulghinish peyda qiliwatqan karxanilarghimu zerbe béridighanliqini tekitlimekte.