Gomindang partiyisining re'isi lyen jen xitayni ziyaret qildi

26-April küni, teywen gomindang rehbiri lyen jen ayali fang yü bilen nenjing ayrodorumigha yétip keldi. AFP

Teywendiki öktichi partiye hésablan'ghan gomindang partiyisining re'isi lyen jen seyshenbe küni nenjinggha yitip kélip, xitay chong quruqliqigha qaratqan tarixi sepirini bashlidi.

Fransiye axbarat agéntliqining xewirige qarighanda, lyen jen nenjing ayrodromida xitay hökümet emeldarlirining qizghin qarshi élishigha érishken. Jyangsu ölkisining yuqiri derijilik emeldarliri uninggha mexsus ziyapet orunlashturghan.

Lyen jen ayrodromda qilghan sözide, gomindang partiyisining ikki qirghaq tinchliqini ilgiri sürüsh üchün, barliq tirishchanliqini körsitidighanliqini bildürgen . U özining bu qétimqi ziyaritining ikki qirghaqning jiddiy munasiwitini yaxshilashni meqsed qilidighanliqini tekitligen.

Lyen jenning xitay ziyariti, 1949 - yili xitayda ichki urush axirlashqandin buyanqi, gomindang rehbirining tünji qétim xitay chong quruqliqini ziyaret qilishi bolup hisablinidu.

Lyen jen teybéy ayrodromidin ayrilishning aldida, nechche yüzligen teywen musteqilliqini qollaydighan kishiler, uning ziyaritige qarshi namayish ötküzgen. Lyen jen'ge qarshi turghuchilar, uning qollighuchiliri bilen öz- ara toqunushushqan hemde liyenjenni teywenni satti dep eyipligen.

Teywen prézidénti chin shüybyen lyen jenning xitayni ziyaret qilishigha qarshi turup kelgen idi. Biraq, u seyshenbe küni öz meydanini biraz yumshitip, liyen jen'ge tilekdashliq bildürgen. Emma u yene, ikki qirghaqta küchiyiwatqan tehdid we riqabetlerge taqabil turush üchün, teywendiki küchlerning choqum ittipaqlishishi kéreklikini tekitligen. (Arzu)