Xitay hökümiti, amérika qoshun chékindürüsh toghrisidiki telepler hörmet qilishi kérek, dédi

Xitay tashqi ishlar minstirliqining bayanatchisi lyü jenchaw, amérika hökümiti amérika herbiy qisimlirini ottura asiyadin chékindurush üchün éniq bir kün belgilesh toghrisidiki teleplerge hörmet qilishi kérek, dédi.

U seyshenbe küni béyjingda muxbirlargha bergen bayanatida, ottura asiya döletliri amérikining bashchiliqida rayonda élip bérilghan térrorchiliqqa qarshi urushqa qatnashti. Lékin hazir weziyet özgerdi, dégen.

Ötken hepte shangxey hemkarliq teshkilatigha eza döletlerning dölet we hökümet rehberliri qazaqistanning paytexti astanida ötküzülgen aliy derijilik yighini jeryanida, birleshme bayanat élan qilip, amérika hökümitini ottura asiyadiki herbiy qisimlirini qachan chikindüridighanliqi toghrisida éniq bir kün belgileshke chaqirghan idi.

Yekshenbe küni qirghizistanda ötküzülgen prézidént saylimida ghelibe qilip, awazlarning mutleq köp qismini qolgha keltürgen qirghizistanning waqitliq prézidénti qurmanbék baqiyéf düshenbe küni bergen bayanatida, shangxey hemkarliq teshkilatining chaqiriqigha parallél halda, amérika herbiy qisimlirining qirghizistanda turush mesilisi qaytidin muzakire qilinishi kérek, dédi.

Amérika tashqi ishlar ministiri kondaliza rayis yekshenbe küni xitay ziyariti jeryanida béyjingda bergen bayanatida, afghanistanda térrorchiliqqa qarshi urushning hélimu dawamlishiwatqanliqini tekitlep, shangxey hemkarliq teshkilatining amérika herbiy qisimlirini ottura asiyadin chékindürüsh üchün éniq bir waqit belgilesh toghrisidiki telipini ret qilghan. Emma, amérika hökümiti téxi baqiyéfning bayanatigha resmi bir jawab qayturmidi.

Amérika birleshme agéntliqining bildürüshiche, béyjing hökümiti, amérika herbiy qisimlirining xitayning gherbiy chégrisigha yéqin bir rayonda mewjut bolup turushidin we rayondiki énérgiye menbelirining xitaygha éqishining tosalghugha uchrishidin qattiq endishe qilidiken. (Qanat)