Xitay kompartiyisi 17 ‏- qurultiyida aliy rehberlik orginigha yéngi kishiler seplinidu

Bu yil küzde ötküzilidighan xitay kompartiyisi 17 ‏- qurultiyining teyyarliq xizmetliri emeliylishish basquchida jiddiy élip bérilmaqta.

Amérika awazi tor bétide, qurultay teyyarliq guruppisigha jyangsu partkom sékrétari li yu'enchyaw bilen shenshi ölke bashliqi yü yujünlerning seplen'genliki hemde kadirlarni orunlashturush we siyasiy doklat teyyarlash organlirida ishleshke bashlighanliqi alahide xewer qilindi.

Mulahizichiler, her besh yilda bir qétim chaqirilidighan kompartiye qurultaylirida yéngi seplinidighan rehberler heqqidiki hikayilerning tarqilishi xitay jem'iyitide adetke aylan'ghanliqini tekitlesh bilen bir waqitta, yuqiridiki ikki kishining merkiziy organdiki siyasiy byurogha kirishi mumkinlikini perez qilishmaqta.

Mulahizichilerning tehlilige asaslan'ghanda, 50 ‏- yillardin kéyin tughulghan, medeniyet inqilabidin kéyinki deslepki türküm aliy mekteplerni püttürgen shuningdek siyasiy ölchemler bilenla emes kespiy tirishchanliqliri bilen otturigha chiqqan bu yéngi bir ewlad kishiler chong boran ‏- chapqunluq islahatlarni qilalmisimu, emma yenila siyasiy sehnide heriket qilalaydiken.

Xongkongluq xitay obzorchi xé lyanglyang bu munasiwet bilen "yéngi bir ewlad rehberlik guruppisining meydan'gha kilishi netijiside, xitay kompartiyisining 18 ‏- hetta 19 ‏- qurultayliridin kéyin xitayning siyasiy islahatidin ümid kütkili bolidu" ghanliqini otturigha qoydi. (Méhriban)