Уйғур аптоном районида шәһәр билән йезилар арисидики кирим пәрқи чоңаймақта

Уйғур аптоном районида " ғәрбни ечиш истратегийиси" йолға қоюлған 6 йилдин бери аптоном районниң ишләпчиқириш омуми қиммити изчил ешип барған болсиму, лекин шәһәрләр билән йезилар арисидики кирим пәрқи давамлиқ кеңийип маңған.

Хитай мәтбуатлириниң хәвәр қилишичә, уйғур аптоном районида 2005 - йили йеза - кәнтләрдики аһалиларниң киши бешиға тоғра келидиған сап кирими 2482 йүән болған болса, шәһәр - базарларда аһалиларниң киши бешиға тоғра келидиған сап кирими 8100 йүәндин тоғра кәлгән.

Шәһәр базар аһалилири билән йеза - кәнт пуқралириниң кирим пәрқидики чоңийиш җуңго һөкүмити дуч келиватқан вә һәл қилишта қийинчилиққа учраватқан мәмликәт характерлик зор мәсилә. Компартийиниң дүшәнбә күни чақирилған сиясий бюро йиғини, бу йил 10 айда чақирилидиған 16 - нөвәтлик 6 - омуми йиғинида бу мәсилини нуқтилиқ музакирә қилишни мақуллиған.

Күзәткүчиләрниң илгири сүрүшичә, кирим пәрқиниң чоңийип кетишини кәлтүрүп чиқарған муһим амилларниң бири пул тапидиған саһәләрни мәнпәәт гуруһлири манапол қиливалғанлиқтин икән. Хитай мәтбуатлири уйғур аптоном райониниң ишләпчиқириш омуми қиммити 1999 - йилдики 116 милярд 900 милйон йүәндин 2005 - йили 260 милярд 900 милйон йүәнгә йетип 5 йил ичидә бир һәссә көпәйди, дәп тәнтәнә қилған болсиму, лекин бу кирим пәрқиниң кеңишини тосап қалалмиған. (Әркин)