Yapon'gha qarshi namayishlar dawam qilmaqta

9-April küni, bir namayishchi béyjingdiki yaponiye elchixanisigha botulka atmaqta. AFP

Xitay tashqi ishlar ministirliqining bayanatchisi ching gang düshenbe küni, shenbe we yekshenbe künliri xitayning herqaysi sheherliride yüz bergen yaponiyige qarshi namayishning mesuliyiti jonggo terepte emes dep bildürdi.

Biraq, yekshenbe küni yaponiyining tashqi ishlar ministiri, xitayning yaponiyide turushluq bash elchisi bilen körüshüp, xitayda yüz bergen chong kölemlik namayishtin narazi bolghanliqini shuningdek xitay da'irilirining derhal yaponiye tereptin resmiy yosunda kechürüm sorap, kélip chiqqan ziyanlarni tölep bérishni telep qilghan idi.

Namayishning sewebi

Eslide, shenbe küni nechche on minglighan béyjingliq yash, yaponiyining xitayda turushluq bash elchixanisi aldigha yighilip shu'ar towlap, ammidin yaponiyide ishlepchiqirilghan mallarni bayqut qilishni teshebbus qilghan we yaponiye elchixanisigha tash étip elchixanining ishik - derizilirini chéqiwetken.

En'giliye b b s radi'o téléwiziye shirkitining yekshenbe künidiki xewiride körsitilishiche, namayishchilar "yaponiyining tarix derslik kitawida 2 - dunya urushi dewridiki urush jinayiti bolupmu xitayda élip bérilghan tajawuzchiliq heriketliri tilgha élinmidi" dégenni bahane qilip, mezkur namayishni élip barghan iken.

Shu küni yene, gu'angju shehiride 3 minggha yéqin kishi yaponiyining gu'angjuda turushluq konsulxanisi aldida shu'ar towlap, saqchilar bilen tirkeshken.

Namayishchilar yene, yapon résturanlirigha tuxum étip, ishik - derizilerni chaqqandin sirt, yollarda toxtitip qoyulghan yapon aptomobillirini urup chaqqan we hetta yapon bayraqlirini köydürwetken.

Xitay hökümitining pozitsiyisi

Ikki künlük qalaymiqanchiliqtin kéyin, xitay tashqi ishlar ministirliqining bayanatchisi chi gang, béyjingda yüz bergen yaponiyige qarshi naraziliq namayishi dawamida, xitay hökümitining namayishchilardin éghir bésiq bolushini, öz pozitsiyisini qanun we tertip astida ipadilishi kéreklikini izchil türde telep qilip kelgenlikini bildürüp, yaponiyining xitaydiki ish béjirish orunlirining we yaponiye puqralirining bixeterlikige kapaletlik qilish üchün, munasiwetlik organlarning bu jehette tedbir alghanliqini alahide tekitligen.

Amérika metbu'atida

"Washin'gton pochta géziti" ning xewiride éytilishiche, béyjing terep bu heqte bayanat élan qilghan bolup, béyjing hökümitining adette ammining namayish ötküzüsh teliwige ruxset bermeydighanliqini, biraq bu qétimqi namayishning alahide bir ehwal astida élip bérilghanliqini otturigha qoyghan.

"Washin'gton pochta géziti" yene , jonggo xelq uniwérsitétidiki bu qétimqi namayishni uyushturghuchilardin biri bolghan bir tetqiqanchining sözini neqil keltürüp, uning we bashqilarning 2 kün ilgiri namayish élip bérish üchün saqchilardin ruxset alghanliqini, saqchilar bolsa neq meydan ehwaligha qarap ulargha jawab bermekchi bolghanliqini bildürgen.

Ilgiri yaponiye terep, xitay hökümitining mektep derslikini bahane qilip hemde ammiwi metbu'atlarni righbetlendürüsh arqiliq, xitay puqralirining yaponiyige qarshi turush keypiyatini yuqiri kötürüshke térishiwatqanliqidin narazi ikenlikini bildürüp kelgen idi.

Yaponiyide chiqidighan "oqurmenler" zhornilining xewiride éytilishiche, xitay hökümiti bu qétimqi namayishning chongiyip kétishidin endishe qilip, bu heqte bérilidighan xewerlerni kontrol qilmaqta iken.

Xewerlerdin melum bolushiche, yekshenbe küni mezkur naraziliq namayishigha qatnashqanlarning sani 20 ming etirapigha yetken.

Küzetküchiler, nöwette yaponiye - xitay munasiwetlirining kündin - kün'ge nacharlishiwatqanliqini bildürmekte. Ularning éytishiche, buning sewebliri aldi bilen xitay tereptin kélip chiqqan . Bolupmu xitayning derslik kitabliri, tarix matiryalliri hetta kino we téléwiziye tiyatirlirida yaponiyining urush dewride xitay puqralirini qandaq öltürügenliki heqqidiki weqelikler intayin wehshi we qorqunchluq qilip teswirlen'gen bolup, xitay puqralirining yaponiyiliklerge bolghan öchmenliki yéqinda shekillen'gen emes iken. (Eqide)