Medeniyet inqilabida Uyghur élige palan'ghan xitaylar shangxeyde namayish qildi

Charshenbe küni 150 ke yéqin kishi shangxeyde namayish qilip, hökümettin medeniyet inqilabida uchrighan ziyanlirini tölep bérishni telep qildi. Bu shangxeylik namayishchilarning köpinchisi medeniyet inqilabi mezgilide Uyghur élige palan'ghanlar iken.

Roytérs agéntliqining xewer qilishiche, namayishchilar " heq telep qilish guna emes" dégen lozonkini kötürüp, shangxey sheherlik hökümet binasi aldida namayish qilghan. Ular özlirining medeniyet inqilabi mezgilide Uyghur élige oxshash chet rayonlargha palan'ghanliqini, hemde mejburiy halda éghir jismaniy emgeklerge sélin'ghanliqini bildürgen.

Bu kishiler yene, medeniyet inqilabi axirliship shangxeyge qaytip kelgende, yer-zéminlirining alliqachan bashqa kishilerge bérilip bolghanliqini sözlep , buning üchün hökümetning ulargha tégishlik heq bérishini telep qilghan. Ottura yashlardiki bir ayal namayishta " ular bizni mejburiy shu jaylargha ewetken. Biz hazir hökümetning bizdin éliwalghan nersilerni tölep bérishini telep qilimiz" dégen.

1966‏- Yili bashlan'ghan medeniyet zor inqilabida az dégende nechche milyon kishi öltürülgen we türmige tashlan'ghan idi. Bu inqilabning 40 yilliqi seyshenbe küni xitayda chong daghdugha peyda qilmidi. Bundaq bolushi kishilerning bu témigha qiziqmighanliqidin emes, belki xitay kompartiyisining bu témidiki her qandaq pa'aliyetlerni qattiq chekligenlikidin boldi. (Peride)