Атасу-алатав нефит турубиси сода характеридики нефит импортини рәсмий башлиди


2006.07.12

Қазақистандин уйғур елигә тутишидиған атасу-алатав нефит турубиси 11‏- ийол күнидин башлап, сода характеридики нефит маңғузуш басқучиға рәсмий қәдәм қойди. Бу хитай үчүн тунҗи қетимлиқ бивастә сода импорт нефит турубиси болуп һесаблиниду.

Қазақистандин башланған 960 километир узунлуқтики бу нефит турубиси алатав еғизидин өтүп қарамайниң майтағқичә тутишидиған болуп, турубидики нефитниң майтағқа йетип келиши үчүн 15 күн кетидикән. Хитай һазир бу турубини хитайниң ичкири өлкилири билән туташтурушқа тиришмақта. Пүтүн қурулуш пүтүп чиққанда қазақистандин хитайға тутишидиған бу турубиниң омумий узунлиқи 3000 километирға йетидикән.

Америка бирләшмә агентлиқиниң хәвәр қилишичә, мәзкур атасу-алатав нефит турубиси хитайни каспий деңизиниң нефитигә еришиш пурситигә игә қилидикән. Хитай даирилири 2010 ‏-йилиғичә бу турубидин йилиға 20 милйон тонна нефит импорт қилидиған сәвийигә йетишни пиланлимақта.

Хитай билән қазақистан енергийә һәмкарлиқини 1997‏- йилидин башлиған болуп, улар нефит туруба қурулушидин башқа йәнә, бир йүрүш тәбиий газ вә нефит сода келишимлирини имзалиди. Мәзкур атасу-алатав нефит туруба қурулуши 2005‏- йили ноябирда пүтүп чиққан һәмдә буниңға 700 милйон америка доллири сәрп қилинған. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.