B d t xitaydin namayishchilarni oqqa tutush weqesini chüshendürüshni telep qildi

Birleshken döletler teshkilatidiki qanunsiz oqqa tutush ehwalini tekshürüsh ishlirigha mes'ul xadim filip alston seyshenbe küni xitay hökümitige xet yézip, ulardin saqchilarning gu'angdungdiki namayishchi puqralarni oqqa tutush weqesi heqqide téximu tepsiliy melumat bérishni telep qildi.

Roytérs agéntliqining xewer qilishiche, 6‏-dékabir küni gu'angdungning shenwéy shehiri dungju kentide saqchilar namayishchilarni qoralliq basturghandin kéyin, xitay hökümiti bu weqede 3 kishining ölgenlikini jakarlidi. Emma dungjudiki ahalilerning melum qilishiche, saqchilar az dégende 20 nechche kishini étip öltürgen. Eger bu san éniqlansa, u halda bu 1989 ‏- yilidiki tyen'enmén weqesidin buyanqi, xitay bixeterlik xadimlirining xelqqe qaratqan chong kölemlik qoralliq hujumi hésablinidu.

B d t ning bir neper bayanatchisining bildürüshiche, filip alston buningdin bir hepte burunmu xitay hökümitige oxshash xet yézip, bu weqe heqqide tepsiliy uchur bérishni telep qilghan hemde bu heqtiki uchurlarni ulargha xitayning jenwediki déplomatiye guruppiliri arqiliq yetküzüshni sorighan. Lékin xitay hökümiti bu teleplerge qarita sükütte boldi.

Xitay hökümiti bu weqeni bir qisim zorawan namayishchilarning hökümetni haqaretlishige chidimighan saqchilarning achchighida ulargha qarita oq chiqirip qoyghanliqi bilen chüshendürdi. (Peride)