Хитай компартийиси мәркизий комитетиниң омуми йиғини йепилди

Хитай компартийиси 16 - қурултийиниң 5 - омуми йиғини сәйшәнбә күни бейҗиңда йепилди. Йиғинда бай - кәмбәғәллик пәрқиниң чоңийишини бир тәрәп қилиш қатарлиқ мәсилиләр бойичә кәлгүси бәш йиллиқ пилан мақулланди.

Бу қетимқи йиғин 4 күн давам қилған болсиму, әмма йиғинниң мәзмуни тоғрисида көп нәрсиләр елан қилинмиди. Йиғинда иҗтимаий вә иқтисадий тәңпуңсизлиқ мәсилиси музакирә қилинған. Б б с, хитай рәһбәрлириниң җәмийәттики иҗтимаий наразилиқлардин әнсирәшкә башлиғанлиқини билдүрди.

Хитайда йезилардики парихорлуқ вә адаләтсизлик пуқраларни исян көтүрүшкә мәҗбурлимақта. Хитай даирилириниң ашкарилишичә, өткән йили хитай бойичә 70 миң қетим наразилиқ һәрикити йүз бәргән болуп, буниңға аз дегәндә 3 милйон адәм иштирак қилған.

Аталмиш "дөләт иқтисади вә иҗтимаий тәрәққиятиниң 5 йиллиқ пилани" да, бурунқиға охшаш иқтисадий тәрәққият сүритини тезлитиш орниға иҗтимаий хизмәтни яхшилаш тәкитләнди.

Бу қетимқи йиғин компартийиниң сабиқ секритари җаң земин пүтүн вәзипилиридин айрилғандин кейин, ху җинтав йитәкчилик қилған тунҗи йиғин болуп һесаблиниду. Әмма бу қетим йиғинда компартийиниң юқири қатлимида кадирларни тәртипкә селиш болмиди. Көзәткүчиләрниң тәкитлишичә, бу ху җиңтавниң һоқуқи техи мустәһкәмләнмигәнликидин дерәк беридикән. (Әркин)