كىشىلىك ھوقۇق تەشكىلاتى: خىتاي مەكتەپلىرىدە ئۆسمۈرلەرنى ئەمگەككە ئېلىش ئىشلىرى مەۋجۇت

2007-12-03
ئېلخەت
پىكىر
Share
پرىنت

باش شىتابى نيۇيوركقا جايلاشقان كىشىلىك ھوقۇقنى كۆزىتىش تەشكىلاتى، خىتاي ھۆكۈمىتىنىڭ ئوتتۇرا- باشلانغۇچ مەكتەپلەردە كىرىم قىلىش ئۈچۈن بالىلارنى ئەمگەككە سالىدىغان قىلمىشلارنى دەرھال ئاياقلاشتۇرۇشى كېرەكلىكىنى كۆرسەتتى.

مەزكۇر تەشكىلاتنىڭ باياناتىغا قارىغاندا، خىتايدا ئۆسمۈرلەر سائەتلەپ ئىشلىتىلگەن ۋە گاھىدا خەتەرلىك ئىشلارغىمۇ مەجبۇرلانغان بولۇپ، بۇنداق قىلمىشلار ئوقۇغۇچىلارنىڭ تەربىيىلىنىشىگە ئەكس تەسىر كۆرسەتكەن.

فرانسىيە ئاگېنتلىقىنىڭ كۆرسىتىشىچە، كىشىلىك ھوقۇقنى كۆزىتىش تەشكىلاتى ئاسىيا بۆلۈمىنىڭ دىرېكتورى سوفىي رىچاردسون خانىم، خىتاي ھۆكۈمىتىنىڭ ئۆسمۈرلەرنى ئەمگەككە سېلىش قىلمىشلىرىغا زەربە بېرىدىغانلىقىنى تەكىتلەپ ۋە قانۇنى بەلگىلىمىلەرنى تۈزۈپ كۆرسەتكەن بولسىمۇ، ئەمما ئۆزى تۈزگەن بەلگىلىمىلەرگە ئۆزى خىلاپلىق قىلغانلىقىنى كۆرسىتىپ: "ئەمما خىتاي ھۆكۈمىتىنىڭ مائارىپ سىستېمىسى ئۆسمۈر ئەمگەكچىلەر ئارقىلىق ئەمەلگە ئاشۇرىدىغان پروگراممىلارنى يۈرگۈزۈش ئارقىلىق ئۆزى بەلگىلىگەن بەلگىلىمىلەرگە ئۆزى خىلاپلىق قىلماقتا" دېگەن.

رىچاردسون خانىمنىڭ بىلدۈرۈشىچە يەنە، بۇنداق ئەمگەكلەردە سالامەتلىك ۋە بىخەتەرلىككە كاپالەتلىك قىلىدىغان ئىشلار يوق دېيەرلىك ھەمدە ئۆسمۈر ئەمگەكچىلەرنى ئېزىش ئىشلىرى سادىر بولۇپ تۇرىدىغان بولۇپ، بۇ خىتاينىڭ ئەمگەك قانۇنىغا خىلاپ ئىكەن.

خەۋەردە كۆرسىتىلىشىچە، خىتاي مائارىپ مىنىستىرلىقى نامرات رايونلاردا يولغا قويغان "تىرىشچانلىق بىلەن ئىشلەپ ،ئىقتىسادچانلىق بىلەن مەكتەپ باشقۇرۇش" سىياسىتىنىڭ سايىسىدە 400 مىڭدىن ئارتۇق 12 ياشتىن 16 ياشقىچە بولغان ئوتتۇرا مەكتەپ ئوقۇغۇچىلىرى دېھقانچىلىق ۋە پىششىقلاپ ئىشلەش ئەمگەكلىرىگە سېلىنغان بولۇپ، 2004- يىلى پۈتۈن خىتاي بۇيىچە، بۇ مەقسەتتە 10 مىليارد يۈەنلىك ئىش ھۆددىگە ئېلىنغان.

مەلۇم بولۇشىچە، خىتايدا ئوقۇغۇچىلار مەكتەپ ئەمگەك كۈچىگە ئېھتىياجلىق ئورۇنلار بىلەن تۈزگەن توختام ئارقىلىق ئوپچە توختام بۇيىچە ئادەم ئىشلەتكۈچى ئورۇنلارغا ئۆتكۈزۈلۈپ بېرىلىدىغان بولۇپ، ھەتتا بەزى ياز كۈنلىرى 14 سائەتلەپ ئەمگەككە سېلىنغان.

رىچاردسون خانىمنىڭ بىلدۈرۈشىچە، خىتاينىڭ قانۇنى ۋە خەلقئارالىق ئەمگەك قانۇنىغا ئاساسەن ئۆسمۈرلەر ئەمگەككە سېلىنماسلىقى كېرەك ئىكەن. (جۈمە)

پىكىرلەر (0)
Share
تولۇق بەت