Фуҗйәндә өзини өлтүрүвелиш характерлик партлаш вәқәси йүз бәрди

• 
  2005-08-08

Дүшәнбә хитайниң фуҗйән өлкиси фуҗу шәһиридә бир хитай деһқан тәрипидин бир аптобуста елип берилған өзини өлтүрүвелиш характерлик партлитиш һәрикитидә бир киши өлгән 31 адәм яриланған.

Шинхуа агентлиқиниң хәвәр қилишичә, вәқәдә өлгән киши партлитишни елип барған 42 яштики деһқан икән. Шинхуа агентлиқиниң хәвиридә, деһқанниң исми берилмигән, лекин униң өпкә рак кесәлликигә гириптар икәнлики билдүрүлгән.

Америка бирләшмә агентлиқиниң вәқә тоғрисидики хәвиридә, хитайда шәхси өч елиш вә кишиләр арисидики сода ихтилаплирида бундақ партлитиш һәрикәтлириниң давамлиқ йүз берип туридиғанлиқи, зиянға учриған вә яки иштин чиқирилған ишчиларниң хитайда наһайити асан тепилидиған партлитиш дорилири билән бундақ вәқәләрни садир қилидиғанлиқи тәкитләнгән.

Хәвәрдә, январда уйғур елидә идарисидин нарази болған бир нәпәр көмүр кан ишчиси тәрипидин елип берилған вә 11 кишиниң өлүмини кәлтүрүп чиқарған һуҗумға алаһидә орун берилгән.

Хитай мәтбуатиниң хәвәрлиригә қариғанда, өткән бир йил ичидә хитайда 1130 қетим партлитиш вәқәси йүз бәргән. (Қанат)