Шәрқ - ғәрб газ турубисиниң - 2 линийисини ятқузуватқан хитайларни қар бесивалди
2008.03.14
Алдинқи күни уйғур елиниң қорғас наһийисидә гозиго өтиңигә 13 километир келидиған йәрдә қар дөвиси гүмүрүлүш вәқәси йүз берип, шу җайда шәрқ -ғәрб газ турубисиниң 2 - линийисини ятқузуватқан хитай ишчиларни қар бесивалди. Шинхуа ахбарат агентлиқиниң бу һәқтики хәвиридә аз дегәндә 12 адәмниң қар астида қалғанлиқини вә 4 адәмниң җәсити тепилғанлиқини билдүргән.
Лекин тәңри тағ ториниң җүмә күнки хәвиридә 22 адәмниң қар астида қалғанлиқини, бир адәмниң қутқузувелинған, бир адәмниң җәсити тепилғанлиқини вә 20 адәмниң һазирға қәдәр из дерики елинилмиғанлиқини илгири сүрди. Даириләр қутқузуш ишиға хитай азадлиқ армийисиниң илидики чегра мудапиә полки вә қораллиқ сақчи шөбә әтритиниң илидики 100 нәпәр әскирини сәпәрвәр қилған.
Тәңри тағ ториниң хәвиридә аптоном районниң муавин рәиси күрәш мәхсутниң вәқә йүз бәргән җайға барғанлиқини билдүрди. Йәрлик пуқраларниң наразилиқи, муһит қоғдиғучиларниң тәнқидигә учраватқан ғәрбниң газини шәрққә йөткәш қурулуши хитайниң зор көләмлик енергийә қурулуши болуп, бу қурулушниң тарим ойманлиқидики тәбий газни хитайниң җаңҗяң дәря делтисидики санаәт районлириға тошушни мәқсәт қилған 1 - басқучи алдинқи йили рәсми пүткән иди. Гозигодики вәқәгә учриған бу қурулуш болса ғәрбниң газини шәрққә тошуш пиланиниң 2 - линийилик басқучи болуп һесаблиниду.
Хитай һөкүмити бу қурулуш йәрликләрниң иқтисади әһвалини яхшилаштики бир пурсәт, дәп тәкитлисиму, лекин чәтәлдики уйғур тәшкилатлар бу қурулушни хитайлар монополийә қиливалғанлиқини, йәрликләрни мәнпәәтдар қилалмиғанлиқини, һәтта йәрлик уйғурларни нефит ишчилиқиғиму алмайдиғанлиқини илгири сүрмәктә. Қар бесивелиш вәқәси йүз бәргәндә 60 дәк ишчи ишләватқан болуп, уларниң һәммиси хитай ишчилар икән. (Әркин)
Мунасивәтлик мақалилар
- Бу йилқи қар вә үшшүк апити уйғур елиниң йеза игиликигә зор зиян елип келиду
- Уйғур елидә йәнә қара апити йүз бәрди
- Хитайниң ғәрбий қисмида йәнә апәт йүз бериши мумкин
- Хотәндә тунҗи қар кәлтүрүп чиқарған апәт һелиһәм давамлашмақта
- Уйғур илидә йүз бәргән апәтләрниң әһвали толуқ елан қилинмайду
- Дехүй сода базирида от апитигә учриған дукандарлар пүтүнләй төләмгә еришип қайта тиҗаритини башлиди
- Хитай һаварайи тармақлири қара апитигә тәйярлиқ қилалмиғанлиқини иқрар қилди
- Хитайда қар апити давамлашмақта
- Қар апити вә соғуқ температура хитай һәм уйғур елини паләч һалға чүшүрүп қойди
- Хитайда йүз бәргән қар апити хитай иқтисадиға зор тәсир көрситиши мумкин
- Хитайда әллик йилдин буян көрүлүп бақмиған қар апити йүз берип қатнаш паләч болди