Xitay - qazaqistan arisida 2 ‏- néfit turubisi yatquzush kélishimi imzalandi

Xitay ‏- qazaqistan atasu - alataw néfit turubisi 2005 - yili resmiy ishqa kirishkendin kéyin, xitay bilen qazaqistan mezkur néfit turubisigha yandash halda 2 ‏- bir turuba liniyisi yasash kélishimi imzalidi.

Xitay metbu'atlirining xewer qilishiche, qazaqistan prézidénti nursultan nezerbayéf, aldinqi küni béyjingda muxbirlargha xitay bilen qazaqistanning 2 ‏- néfit turubisini qurush toghrisida resmiy kélishim imzalighanliqini bildürgen. U, bu qurulush "kaspiy déngiz sahilini xitayning gherbiy - shimaligha tutashturidighan " liqini bildürgen. U yene muxbirlargha bu sepiride xitaylar bilen ikki dölet arisida teb'iy gaz turubisi yatquzush mesilisini muzakire qilghanliqini ashkarilidi.

Nezerbayéfning besh künlük xitay ziyariti 19 - dékabir küni bashlan'ghan bolup, u ziyaritining 2 ‏- küni xitay terep bilen soda - iqtisadi, medeniyet, ma'arip, tömür yol, énérgiye qatarliq sahelerge chétilidighan 11 türlük kélishim imzalidi. Xitay - qazaqistan arisida 2 ‏- néfit turubisini yatquzush kélishimi xitay néfit - teb'iy gaz guruhi bilen qazaqistan néfit - teb'iy gaz hessidarliq shirkiti arisida imzalandi. Buningdin sirt xitay terep qazaqistan yawro-asiya uniwérsitéti bilen qazaqistanda kongzi uniwérsitéti qurush kélishimi imzalighan.

Lékin qazaqistanda xitayning rayondiki niyitige guman bilen qaraydighan bezi siyasiy erbaplar, qazaqistanni néfitining pütünley xitaygha baghlinip qélishidin hezer eyleshke chaqirmaqta. (Erkin)