Xitay rusiyidin yene qoral sétiwaldi

Xewerlerdin ashkarilinishiche, rusiye bilen xitay besh yüz milyon dollar qimmitidiki qoral –yaraq soda kélishimige qol qoyghan.

Amérika awazi radi'osining uchuridin qarighanda, moskwadiki bir qoral yaraq zawuti xitaygha 150 nechche dane ayropilan herketlendürgüchisi sétip bergen bolup, bu heriketlendürgüchi üskünilerning hemmisi rusiyidin kirgüzülgen SU-27 tipliq küreshchi ayropilanlarni özgertip yasash üchün ishlitilidiken.

Xitay bir tereptin rusiyining ilghar küreshchi ayropilanlirini sétiwalsa, yene bir tereptin rusiyining bu sahediki téxnikisinimu kirgüzüp, öz aldigha yasash üchün tirishmaqta. Xewerlerge qarighanda, 1996-yili, xitay rusiye bilen 200 dane su-27 tipliq küreshchi ayropilan ishlep chiqirishning ruxsiti heqqide kélishim tüzüp, bu salahiyetke érishken, mezkur kélishim 2 yérim milyard dollargha toxtighan bolup, möhliti 15 yil bolghan idi. Shunga hazir xitay mezkur möhlet toshqiche bu ayropilanlarni yasap püttürüshke heriket qilmaqta.

Xewerde yézilishiche, rusiye xitaygha sétip bergen SU -27 tipliq ayropilan téxnikisi kona téxnika bolup, xitay terep bu ayropilandin yüzni yasap bolghandin kéyin derhal uni toxtitip, buning ornigha bashqa ilgharraq ayropilanni yasashqa kirishken.

Xewerlerge qarighanda, xitay hazir rusiyining eng chong qoral-yaraq xéridarigha aylan'ghan. Ikki dölet arisidiki herbiy munasiwetlerning asasliq meqsiti qoral-yaraq sodisigha qaritilghan iken. (Ümidwar)