Хитайда қуш зукими өрдәкләрдә байқалди


2007-09-17
Share

Хитай йеза игилик министирлиқи H5N1 типлиқ қуш зукиминиң гуаңдуң өлкисидики пәнйү райониға җайлашқан өрдәк фермисида тарқалғанлиқини муқимлаштурди.

Хоңкоңға йеқин җайлашқан гуаңҗу шәһириниң пәнйү районидики 5 бақмичилиқ фермисида қуш зукими тарқилип, һазирға кәлгүчә 10 миңға йеқин өрдәк өлгән. Өлгән өрдәкләрниң тоқулма өрнәклири устидин елип берилған тәкшүрүш нәтиҗисигә қариғанда, өлгән өрдәкләр тенидә, кесәл пәйда қилиш хәтири интайин юқири болған H5N1 типлиқ қуш зукими вируси байқалған.

Бирләшмә агентлиқи бу һәқтә бәргән хәвәрдә, хоңкоң сәһийә ишлириға мәсул әмәлдари җу йийөниң ейтқанлирини нәқил кәлтүрүшичә, хитай сәһийә министирлиқи юқириқи кесәллик әһвалини H5N1 типлиқ қуш зукими вируси дәп бекиткән.

Мәзкур қуш зукиминиң техиму кәң тарқилип кетишниң алдини елиш үчүн, юқириқи бақмичилиқ фермилирида 14 -сентәбиргичә 32миң 630 данә өрдәк өлтүрүлгән.

Б б с ниң 17 -сиентәбирдики хәвиригә қариғанда, гуаңҗу шәһәрлик һөкүмити, пәнйү районидики қуш зукими вируси байқалған бақмичилиқ фермисиға йеқин җайлардин 100 миңға йеқин өй қушлирини өлтүрүшни башлиғанлиқини уқтурған.

Тиббий мутәхәссисләр агаһландуруш берип, әгәр бу типтики қуш зукиминиң алди елинмиса вә яки бу хилдики вирус үнүмлүк контрол қилинмиса, бу хил вирус адәмгә техиму асан йол билән юқидиған шәкилгә өзгирип қалса, ақивәттә милйонлиған адәмниң өлүшини кәлтүрүп чиқириши мумкин икән.

Дуня сәһийә тәшкилатиниң мәлуматиға қариғанда, хитай ой қушлири әң коп беқилидиған дөләт болуп, 2003- йили H5N1 типлиқ қуш зукими хитайдин тарқилип дуня буйичә 328 адәмгә юққан вә буларниң ичидә 200 адәмниң җениға замин болған иди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт