Xitaydiki ikki jayda yene yéngidin qush zukimi wirusi bayqaldi

Xitayning xubéy ölkisi we ichkiy molghulgha yene yéngidin qush zukimi wirusining tarqalghanliqi bayqaldi. Xitay yéza- égilik ministirliqining yekshenbe küni éniqlishiche, ichkiy molghuldiki bir qush férmisi we xubéydiki bir ghaz férsimida yene H5N1 tipliq ejellik qush zukimi wirusi bayqalghan. Xubéyning shishuw shehiri etrapidiki ghaz férmisida 3500 dek ghaz ölgen. Ichkiy molghulda bolsa 176 öy qushi ölgen. Xitay da'iriliri bu ikki férma etrapidiki rayonlardiki qushlarni öltürüp, wirusning tarqilishining aldini éliwatqanliqini bildürdi.

Fransiye axbarat agéntliqining xewirige qarighanda, xitaydiki qush zukimi kirizisi barghanséri éghirlashmaqta. Hazirghiche xitaydiki 21 orunda qush zukimi wirusi bayqalghan. Bu sewebtin 150 minggha yéqin qush ölgen. 21 Milyondin artuq qush boghuzlan'ghan. 45 Yéza buning tesirige uchrighan. Buning ichide Uyghur élidiki töt jaydimu qush zukimi wirusi bayqalghan idi.

Xitayning mu'awin yéza- igilik ministiri yinning bildürüshiche, gerche qismen rayunlarda qush zukimi pütünley kontrol qilin'ghan bolsimu, emma omomyüzlük tarqilish ehwal yenila intayin éghir hésablinidu. U soghuqning küchiyishige egiship, késellikning tarqilish ehwalining yenimu éghirlishishi mumkinlikini körsetti. U yene xitayda asasiy qatlamdiki aldini élish xizmetlirining arqida qalghanliqini, buninggha taqabil turush üchün, xitay hökümitining qush zukimi tarqilish ehwallirini töt sa'et ichide merkezge doklat qilish belgilimisni bikitkenlikini bildürdi.

Qush zukimi 2003 - yili sherqiy jenubiy asiyada bayqalghandin buyan, 60 tin artuq adem qush zukimi bilen öldi. Xitaydimu bu ayda bir kishining qush zukimi bilen ölgenliki éniqlandi. (Arzu)