Teywen herbiy terepning muhim alaqe we maniwér mexpiyetliki xitayning qoligha chüshüp qaldi


2007.04.09

Teywen jasusluq orgini xitayning tuyuqsiz hujumigha teqlid qilin'ghan bir herbiy maniwér ötküzüshni pilanlighan, emma bu heqtiki matériyallar teywen herbiy xadimining sewenliki tüpeyli xitayning qoligha chüshüp ketken.

Eslide teywenning mushu ishqa alaqidar bir herbiy emeldari mezkur matériyallarni buyruqqa xilap halda öyige élip ketken bolup, bu matériyallar xitay kompyotér xaykirliri qoyup bergen "troyan éti" wirusining hujumigha uchrap oghrilap kétilgen.

Fransiye agéntliqining 9 ‏- april bergen xewiride éytilishche, teywenning chén shuybyen qatarliq yuqiri derijilik emeldarliri arilashqan bu qétimliqi herbiy maniwér bir nechche kün ichide shimaliy teywende ötküzülmekchi iken.

Teywen dölet mudapi'e ministirliqi uqturush chiqirip, mezkur herbiy mexpiyetlikning ashkarilinip qélish hadisini tekshüridighanliqini bildürgen.

Melum bolushiche, "xen gu'ang 23" dep atalghan herbiy maniwérida négizlik rol oynighan polkownik, xitay azadliq armiyisining teywen'ge qarshi qozghash éhtimalliqi bolghan hujumigha teqlid qilin'ghan sanliq melumatlar qoyulghan bir kichik saqlighuchni öyige élip ketken bolup, bu saqlighuchqa herbiy alaqini kücheytish üchün teywen 2003 ‏- tarqatqan "boshéng en" herbiy programmisi we teywen qoralliq qismining jasusluq we közitish iqtidarigha a'it matériyalliri saqlan'ghan iken.

Teywen dölet bixeterliki byurosi xadimi lyu shusünning bildürüshiche, bu matériyallarning xitay qoligha chüshüp qélishi teywen bixeterlikige mu'eyyen ziyan élip kélidiken. Lékin u bu heqte tepsiliy toxtalmighan. (Jüme)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.