Xitay sherqiy türkistan islamiy heriktige qarshi xelq'ara jama'etni yardemge chaqirdi

Xitay hökümiti sherqiy türkistan islamiy herikiti ezalirigha qarshi élip baridighan basturush herikitide xelq'ara jama'etning yardimini qolgha keltürüshke tirishidighanliqini bildürdi.

Xitay tashqi ishlar ministirliqining bayanatchisi jyang yü béyjingda muxbirlarning, xitay hökümitining pakistandiki xitay diplomatliri üchün bixeterlik tedbirlerni kücheytkenliki toghrisidiki su'allirigha jawap bérip mundaq dégen: "birleshken döletler teshkilati bixeterlik kéngishi sherqiy türkistan islamiy herikitini térrorchi teshkilatlar tézimlikige kirgüzdi. Shuning üchün sherqiy türkistan islamiy herikitige qarshi turush xelq'ara térrochiliqqa qarshi élip bériliwatqan pa'aliyetlerning ayrilmas bir qismi hésablinidu".

Xitay tashqi ishlar ministirliqining bayanatchisi, xitay hökümitining sherqiy türkistan islamiy herikitige qarshi turush üchün bashqa döletler bilen hemkarlishidighanliqini bildürgen.

Xitay hökümiti, ötken hepte, sherqiy türkistan islamiy herikiti ezalirining pakistandiki xitay diplomatlirini élip qéchishni pilanlighanliqini bildürüp, pakistan hökümitidin xitay diplomatlirini qoghdash üchün bixeterlik tedbirlirini kücheytishini telep qilghan idi.

Dunya Uyghur qurultiyi xitayning bu herikitige inkas qayturup, xitay hökümiti "sherqiy türkistan islamiy herikiti ezaliri xitay diplomatlirigha qarita hujumgha teyyarliniwatidu" dégen'ge oxshash yalghan xewerler tarqitish arqiliq pakistandiki Uyghurlarni basturushni pilanlawatidu dep körsetken. (Qanat)