Xitay, rusiye we ottura asiya sotchilirini Uyghurlargha qarshi xitay bilen hemkarliqni kücheytishke chaqirdi

Xitay, shangxey guruhidiki rusiye we ottura asiya ellirining aliy sotchilirini xitay bilen térrorchiliqqa qarshi hemkarliqni kücheytishke chaqirdi. Xitay emeldarliri peyshenbe küni bashlan'ghan shangxey guruhidiki döletler aliy sotchilirining yighinida peqet térror, bölgünchilik we diniy esebiylikke zerbe bergendila siyasiy muqimliqni saqlighili bolidighanliqini tekitligen.

Xitay aliy sot mehkimisining mu'awin bashliqi jang jün, "bölgünchilik we esebiylik bayriqini kötürüwalghan her xil - her shekildiki térrorluq pa'aliyetler qutrumaqta " deydu. Xitay da'iriliri Uyghur musteqilliq herikiti yaki Uyghur siyasiy , diniy öktichilirini " üch xil küchler " dep eyiblisimu, lékin kishilik hoquq teshkilatliri xitay térrorchiliqni bahane qilip, Uyghurlarni basturmaqta, dep qaraydu.

Amérika tashqiy ishlar ministirliqining diniy erkinlik doklatida, xitay da'irilirini Uyghur diniy pa'aliyetchiliri we siyasiy öktichilerni térrorchilar bilen bir orun'gha qoymaqta, dep eyibligen. Chet'el metbu'atlirining xewer qilishiche,xitay emeldarliri yighinda sherqiy türkistan küchlirining pa'aliyitini bu döletlerde " jinayi heriket" dep tonush we bu kishilerni xitaygha ötküzüp bérishke chaqirip, bu shekilde rayonning bixeterlikige töhpe qoshushni telep qilghan.

Dunya Uyghur qurultiyi bolsa bu yighinni eyiblidi. Qurultay bayanatchisi dilshat rishit," xitay sherqiy türkistan mesilisini térrorchiliq bilen baghlap, Uyghurlar bilen béyjing arisidiki igilik hoquq mesilisini yoshurmaqta " deydu. (Erkin)