Xitay "tyen'enmén aniliri" ining tyen'enmin meydanigha bérip qaza qilghan uruq‏- tughqanlirigha teziye bildürüshige yol qoyghan


2007.06.04

Bügün, xitayda siyasi islahat telep qilip élip bérilghan "4-iyun tyen'enmén oqughuchilar herikiti" qanliq basturulghinigha 18 yil boldi. Mushu munasiwet bilen xongkongda minglighan amma sham yandurup qirghinchiliqta qurban bolghanlarning rohini séghinip ulargha teziye bildürdi.

Emma, bezi kishilik hoquq pa'aliyetchilirining bildürüshiche, béyjing terep tyen'enmén weqesi xatire künidiki amanliqini téximu kücheytken we bezi tonulghan öktichilerni qolgha alghan hem ulargha tehdit salghan.

Fransiye agéntliqining xewer qilishiche, shu qétimliq namayishqa qatnashqan pu jichyang, özining "amérika awazi radi'osi" ning ziyaritini qobul qilip uzun ötmey tutulghanliqini we ikki sa'ettin kiyin qoyup bérilgenlikini bildürgen.

"Tyen'enmén aniliri" teshkilatining qurghuchiliridin biri bolghan ding zilinning bildürüshiche, hökümet ularning 3- iyun kechte tyen'enmin meydanigha bérip qaza qilghan uruq‏- tughqanlirigha teziye bildürüshige yol qoyghan.

U mundaq deydu: "mushu 18 yilidin béri tunji qétim bizge bu ishni qilishqa yol qoyuldi. Belkim hökümet 2008-yilliq olimpik yighinidin burun obrazini yaxshilashqa tirishiwatqan bolushi mumkin." Lékin, düshenbe küni kündüzi, hökümet tyen'enmén meydanining amanliqini saqlash üchün nechchiligen saqchi mashinisi ewetken.

1989-Yili 4- iyun, xitay xelq azadliq armiyisi tanka- bronéwiklar bilen siyasi islahat telep qilip namayish qilghan oqughuchilarni qattiq basturghan we nechche yüzligen oqughuchilarni öltürgen idi. Roytérs agéntliqining 4- iyundiki xewiride qeyt qilinishiche, belkim bu san nechche minggha yétish mumkin iken.

Mezkur oqughuchilar herikitini teshkilligüchilerning bérisi Uyghurlar arisida nami meshhur örkesh bolup, u hazir teywende hayat kechürmekte.(Jüme)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.