Гуаңдуңда йәр маҗраси сәвәбидин деһқанлар билән сақчилар тоқунушуп қалди

• 
  2006-06-14

Гуаңдуң өлкисидә 23‏- ийон күни йәр даваси қиливатқан нәччә миңлиған деһқан сақчилар билән тоқунушуп қелип, аз дегәндә икки киши яриланған.

Бу маҗраға четилған шәнте-хүйшиң өй-мүлүк тиҗарити ширкитиниң америка бирләшмә агентлиқиға мәлум қилишичә, нәччә миңлиған деһқан бу ширкәтниң уларниң йәрлирини сетивалғанлиқи үчүн бәргән һәққиғә нарази болуп намайиш қилған һәмдә мәзкур ширкәт қурулуш қиливатқан җайларни уруп-чеқишқа башлиған. Нәтиҗидә деһқанлар бу ширкәтниң икки нәпәр муһапизәтчисини уруп яриландурған.

Бу ширкәт мәсули деһқанлар билән болған тиҗарәтниң қанунлуқ елип берилғанлиқини тәкитлигән болсиму, лекин деһқанларниң йәр-земини үчүн зади қанчилик һәқ бәргәнликини ейтишни рәт қилған. Хитайда бу хил йәр маҗралири күндин-күнгә еғирлишиватқан болуп, көпүнчә деһқанлар йәр содигәрлириниң йәрлик һөкүмәт рәһбәрлири билән бирлишип, деһқанларниң йәрлирини әрзан баһада сетивалғанлиқидин зарлинидикән.

Хитай һөкүмитиниң 2005‏- йили декабирда чиқарған бир доклатида көрситилишичә, өткән йили 11 айниң ичидә һөкүмәт әмәлдарлириниң қанунсиз һалда ишләткән һөкүмәт пулиниң соммиси 290 милярд йүән йәни 36 милярд америка доллириға йәткән. (Пәридә)