Түркийә хитай билән уйғурлар вә күрд мәсилиси бойичә мәхпий келишим түзгән


2006.03.28

Түркийә билән хитай 1998 - йили уйғурлар вә күрд мәсилиси бойичә террорчилиққа қарши мәхпий келишим түзүп, бир - биригә уйғурларниң түркийидә хитайға қарши паалийәт елип беришиға йол қоймайдиғанлиқини вә бейҗиң һөкүмити күрдләрниң түркийигә қарши хитайда паалийәт елип беришиға рухсәт қилмайдиғанлиқини вәдә қилған.

Исмини ашкарилашни халимайдиған әмма вәқәдин хәвәрдар түркийилик әрбапларниң ашкарилишичә, бу келишим әйни чағдики түркийә ички ишларминистири саадәттин тантан билән хитай җамаәт хәвпсизлик министири җя чүнваң тәрипидин саадәттин тантан бейҗиңни зиярәт қилғанда имзаланған.

Һәр иккила дөләт һазирғичә хитай - түркийә оттурисида бундақ бир келишимниң барлиқини елан қилип бақмиған болсиму, әмма йеқинқи бир қанчә йилдин бери икки дөләт әдлийә даирилириниң өз ара берип - келиши рошән дәриҗидә көпийишкә башлиған.

Вәқәдин хәвәрдар түркийилик әрбапларниң тәкитлишичә, түркийә һөкүмитиниң явропа вә америкидики бәзи уйғур сиясий рәһбәрлирини түркийә чегрисидин киргүзмәсликигә бу келишим сәвәбчи болған. Түркийә даирилири илгири дуня уйғур қурултийиниң баш катипи долқун әйсани чегрида тосувалған иди.

Түркийә 1998 - йили мәсуд йилмаз һөкүмити дәвридә мәхпий һөҗҗәт чүшүрүп, һөкүмәт вә дөләт әрбаплириниң шәрқий түркистан тәшкилатлири уюштурған йиғинларға қатнишишини вә йиғин залиға шәрқий түркистан байриқи есишни чәклигән иди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.