Xitay hökümet axbaratliri: barak obama amérikining siyasiy sistémisigha özgirish élip kélelmeydu

 Emma, xitay hökümet axbaratlirining melumatlirida barak obamaning amérikining siyasiy sistémisigha alahide özgirish élip kélelmeydighanliqi otturigha qoyulghan bolup, roytérs agéntliqining "junggo géziti" de bu heqte bérilgen xewerdin neqil élip körsitishiche, xewerde barak obamaning hoquq sehnisige chiqishi, eksiche amérikida irqiy tepriqichilik keltürüp chiqiridighanliqi ilgiri sürülgen.

Mezkur gézitte barak obamaning amérikida barghanche mustehkemliniwatqan irqiy inaqliqning wekili bolup meydan'gha chiqqanliqidek alahidilikige qarita bir xil müjimel közqarash otturigha qoyulghan hemde barak obama özini " irqiy inaqliqning wekili dep atashning ornigha irqiy assimilatsiyining simwoli dep atisa téximu muwapiq bolidu" dep körsitilgen.

"Junggo géziti" de bu heqte bérilgen bash maqale mezkur gézitning bash muherriri ding gangning qelimi astida élan qilin'ghan bolup, u maqaliside: "obama aq tenlik amérikiliqlarning özini ésil dep bilidighan tonushini aghduruwételmidi. Eksiche, uning meydan'gha chiqish bu idiyini qollidi" dep körsetken.

Xewerde yene, barak obama we jon mékkéyinlarning "islahat" qartini oynawatqanliqi, emma her ikkilisining özliride négizlik perqlerni meydan'gha chiqirishta yenila oxshash cheklimige uchraydighanliqi ilgiri sürülgen.

Amérika kéngesh palta ezasi barak obama, démokratchilar partiyisige wakaliten 2008 - yilliq amérika prézidéntliq namzatliqini utup chiqqan bolup, u jumhuriyetchiler partiyisi namzati jon mékkéyin bilen prézidéntliq riqabitige chüshidu.