Xitay hökümiti yadro bombisi we atom siniqigha qatnashqanlargha yardem puli tarqatmaqchi

Xitay axbarat wastilirining xewer qilishiche, xitay hökümiti yadro bombisi we atom siniqigha qatnashqan ofitsér ‏- eskerlerge yardem puli béridighanliqini uqturghan bolup, melum bolushiche, bu xitay hökümitining tunji qétim shundaq qararni élishi bolup hésablinidiken.

Gerche, xitay xelq ishlar ministiri li shöju xitay hökümitining bu xildiki "yardem puli " ni ötken yilidin bashlap tarqitishqa bashlighanliqini bildürgen bolmisimu, qanchilik miqdarda we qanche ademge bérilidighanliqi heqqide toxtalmighan.

Emma li shöju mezkur yardem puli bérishning yadro siniqigha qatnashqan herbiy ‏- ofitsérlar we awam xelqqimu qaritilghanliqini, ötken yili xitay hökümitining herbiy septin chékin'gen 8 milyon ofitsér ‏- eskerlerge 15 milyard 120 milyon yüen tarqitip bergenlikinimu qoshumche qilghan.

Xitay tunji atom siniqini 1964- yili 10- ayning 16- küni Uyghur élining lopnor rayonida élip barghan bolup, b b s da körsitilishiche, hazirgha kelgiche shu xildiki sinaqtin 40 nechche qétim élip barghan.

Xitay xelq ishlar ministiri li shöju bu xilidiki yardem pulini Uyghur élide atom radi'atsiyisining biwaste tesirige uchrighan yerlik ammigha tarqitilidighan yaki tarqitilmaydighanliqi, eger tarqitilsa qandaq yosunda tarqitilidighanliqi üstide tepsiliy toxtalmighan.

Xitay 1996- yili 7- ayda atom siniqi élip bérishni toxtatqanliqini uqturghan we shu yili 9- ayda "b d t atom sinaq qilishni toxtitish kélishimnamisi" ge imza qoyghan bolsimu, bu kélishim xitayda téxi heqiqiy küche ige emes. (Jüme)