Xitay, dalay lama wekilliri bilen söhbetleshkenlikini étirap qildi


2007.07.03

Xitay hökümiti, xitay da'irilirining dalay lamaning wekilliri bilen tibet mesiliside söhbet ötküzgenlikini étirap qildi.

Lékin xitay tashqi ishlar minsitirliqining bayanatchisi chéng gang 6‏- ayning 3‏- küni béyjingda muxbirlargha bergen bayanatida, xitay hökümiti bilen dalay lama wekilliri otturisda élip bériliwatqan söhbetlerning ehmiyitini azaytishqa tiriship, lodi geri we uning hemrahliri resmiy wekil emes" dep körsetti. Lékin u "merkizi hökümetning munasiwetlik xadimliri ular bilen söhbetleshti" dédi.

Chéng gang mundaq dédi ": her yili nurghunlighan tibetlik weten söyerler sayahet we tuqqan yoqlash üchün tibetni ziyaret qilidu. 2002‏- Ylidin béri lodi geri we bashqilar tuqqan yoqlash, dostliri bilen körüshüsh we sayahet üchün bir nechche qétim tibette, we ichkiride ziyarette boldi."

Dalay lamaning amérikidiki alahide wekili bolghan lodi geri, xitay bilen élip bériliwatqan söhbetlerde tibet wekiller ömikige riyasetchilik qilmaqta.

Lékin xitay tashqi ishlar minstirliqining bayanatchisi, lodi geri we hemrahlirining dalay lamagha yéqin kishiler ikenlikini étirap qilip,"biz bu kishilerning hindistan'gha qaytqandin kéyin, tibettiki weziyet heqqide dalay lamagha toghra melumat bérip, uning weziyetni chüshinip, toghra yol tallishigha yardem bérishini ümid qilimiz " dédi.

Dalay lamaning wekilliri bilen xitay hökümiti otturisidiki biwaste uchrishishlar 2002‏- yili séntebir éyida bashlan'ghan bolup, ötken hepte béyjingda ötküzülgen söhbet, xitay hökümiti bilen dalay lama wekilliri otturisda ötküzülgen 6‏ - qétimliq söhbet hésablinidu.

Gerche xitay hökümiti, dalay lama wekilliri bilen élip bériliwatqan söhbetlerning ehmiyitini azaytishqa tirishiwatqan bolsimu, lékin siyasiy mulahizichiler, xitay hökümitining dalay lamaning wekilliri bilen biwaste söhbet élip bérishni qobul qilishining özi , xitayning dalay lamani tibet xelqining wekili dep qobul qilghanliqi, tibet mesilisini bir terep qilish üchün uning wekilliri bilen körüshüshini zörür bilgenlikining ochuq ipadisi, dep körsetmekte. (Ömer qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.