Xitay bilen pakistan erkin soda kélishimi imzalidi

Xitay dölet re'isi xu jintaw jüme küni pakistan bilen erkin soda kélishimi imzalap, xitayning kona ittipaqdishi pakistan bilen munasiwitini yéngi pellige kötürüshke maqul boldi.

Pakistan sepirini peyshenbe küni bashlighan xu jintaw, yéqinqi 10 yildin béri bu döletni ziyaret qilghan tunji xitay dölet re'isidur. Ikki dölet shu küni erkin soda kélishimini öz ichige alghan 18 türlük kélishim imzalidi. Terepler xitay - pakistan soda munasiwitini kelgüsi 5 yil ichide 15milyard dollargha yetküzüshni ümid qilmaqta.

Roytérs axbarat agéntliqi ikki terepning yadro éléktir istansisi qurush kélishimi imzalighanliqini körsitidighan gumanlar bar, dep xewer berdi. Xu jintaw pakistan prézidénti musherrep bilen ötküzgen muxbirlarni kütüwélish yighinida "jonggo - pakistan bilen bolghan munasiwitini dawamliq türde istratégiyilik we uzun - muddetlik munasiwet nuqtisidin qaraydu, dep tekitligen.

Küzetküchiler, xitayning bir qanche on yillardin béri pakistan bashqurulidighan bomba we yadro qorallar programmisini qollap kéliwatqanliqini ilgiri sürmekte. Shuning bilen birge xitay islam'abadning bu dölettiki sherqiy türkistan teshkilatlirini yaki pa'aliyitini basturup kéliwatqanliqidin nahayiti memnun.

Pakistan hökümiti xelq'ara kishilik hoquq teshkilatliri we b d t musapirlar idarisining naraziliqigha qarimay bu dölettiki Uyghur siyasi musapirlirini xitaygha tutup bermekte. Pakistan hökümiti buningdin 2 - 3 yil ilgiri xitaygha ötküzüp bergen Uyghur musapiri memet toxtini xitay da'iriliri muddetsiz qamaq jazasigha höküm qildi. (Erkin)