Бир гуруппа хитай зиялийлири дөләт кабинтиға хәт йезип " әмгәк билән өзгәртиш" қанунини бикар қилишни тәләп қилди


2007.12.04
Share on WhatsApp
Share on WhatsApp

Франсийә ахбарат агентлиқиниң 4 - декабир хәвәр елан қилишичә, йеқиндин буян хитайда "қанунни тәшвиқ қилиш күни"дәп бекитилгән 4 - декабир йетип келиштин илгирила хитай хәлқ гезити вә башқа дөләт игидарчилиқидики тәшвиқат, ахбарат саһәси һәдәп " қанун билән идарә қилиш роһини җари қилдуруп, қанун билән дөләт башқурушни илгири сүрәйли" дегән сәрләвһә астида һәр түрлүк тәшвиқат һәрикитини елип бериватқан бир пәйттә, 43 нәпәр хитай академик алимлар, алий мәктәпләрдики қануншунаслар һәмдә адвокатлардин тәркип тапқан хитай зиялийлири, хитай дөләт кабинти қанун- түзүм ишханисиға, хитайда йүргүзүлүватқан "әмгәк билән өзгәртиш" түзүмини бикар қилиш тоғрулуқ очуқ хәт язған.

Мәзкур очуқ хәт, хитай дөләтлик иҗтимаий пәнләр академийисиниң академики, қанун вә иқтисадшунас мав йүшиниң йетәкчиликидә тәйярланған болуп, хәттә хитайда йүргүзүлүватқан әмгәк билән өзгәртиш түзүминиң асасий қанунға хилап болғандин башқа, хитай қол қойған хәлқара келишимләргиму хилап икәнлики көрситилип, " әмгәк билән қайта тәрбийиләш алаһидә заман вә макан шараитида мәйданға кәлгән тарихий һасилат болуп, әгәр у дөләт қурушниң дәсләпки мәзгилидә җәмийәтниң муқимлиқини сақлашта өткүнчи характерлик рол ойниған болса, ундақта "қанун билән дөләт башқуруш," дөләтниң кишилик һоқуқни һөрмәтләш вә униңға капаләтлик қилиши" асасий қанунға киргүзүлгән бүгүнки күндә, йерим әсирдин узақ созулған әмгәк билән қайта тәрбийиләш түзүми барғанчә дәвәр еқимиға қарши нәрсигә айлинип қалған болуп, дөләтни қанун билән башқуруш қәдимигә еғир тосқунлуқ қилмақта," дәп көрситилгән.

Нөвәттә хитай зиялийлириниң хитай дөләт кабинтиға йоллиған әмгәк билән өзгәртиш қанунини бикар қилиш һәққидики очуқ хети, хитайниң дөләт ичи вә сиртидики тор бәтлиридә күчлүк муназирә қозғиди. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.