Хитай дөләт рәиси ху җинтав москваға енергийә содиси қилиш үчүн йетип кәлди


2007-03-26
Share

Хитай дөләт рәиси ху җинтав 26 -март дүшәнбә күни москваға йетип кәлди. У бу җәрянда росийә президенти владимир потин билән хитай- росийә сода мунасивитини раваҗландуруш вә сиясий вә һәрбий мунасивәтләрни илгири сүрүш үчүн сөһбәт елип бариду.

Руслар тәминлигән санлиқ мәлуматларға қариғанда, хитай билән росийә арисидики сода алақиси өткән йили 43 пирсәнт өрлигән болсиму, лекин бу өрләш йәнила хитайларниң пайдисиға тохтиған. Хитайниң русийигә чиқарған експорт миқдари 79 пирсәнт, русларниң хитайға чиқарған експорт миқдари 21 пирсәнт болған.

Хитай- русийә мунасивәтлиридики йәнә бир йошурун мурәккәплик болса: русийидә нопусниң шиддәт билән төвәнлиши, русийиниң шәрқи районлирида олтурақ аһалиниң шалаңлишишини кәлтүрүп чиқарған. Шуниң билән бу районлар хитай көчмәнлириниң үзлүксиз ямрап кириш тәһдитигә дуч кәлгән.

Рус тәһлилчилири хитай русларниң һәрбий рәқибигә айлиниши мумкин дегән гуманий қарашларни оттуриға қойған болсиму, лекин буларниң һәммисини нәзәрдин сақит қилған рус һөкүмити хитайға нәччә милярд долларлиқ реактип айропиланлар вә башқурулидиған бомба, су асти парахотлири вә кичик типлиқ қоғдиғучи парахотларни сетип берип хитайни рус һәрбий санаитиниң әң чоң истималчисиға айландурған иди.

Хитайниң рус енергийә байлиқилириға болған еһтияҗи күнсайин өрлигән болсиму, башқа содилири пәқәт кийим-кечәм, оюнчуқлар вә әрзан баһалиқ електронлуқ мәһсулатлар билән чәкләнгән.

Өткән йиллиқ бу икки дөләт арисидики сода соммиси 34 милярд америка доллири болған болуп, бу хитайниң өткән йилидики омумий сода миқдариниң икки пирсәнтини игиләйдикән. Ху җинтавниң рус мәтбуатлириға бәргән мәлуматиға қариғанда, бу икки дөләт арисидики сода соммиси 2010 ‏- йилға барғичә 60-80 милярд долларға йетидикән. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт