Xitay dölet re'isi xu jintaw kiler hepte shimaliy koriyini ziyaret qilidu

Xitay dölet re'isi xu jintaw kiler hepte shimaliy koriyini ziyaret qilidu. Bu uning dölet re'isi bolghan üch yildin buyan tünji qétim pyongyangni ziyaret qilishi bolidu.

Amérika birleshme axbarat agéntliqining xewirige qarighanda,xujintaw shimaliy koriyige qilidighan üch künlük ziyaritini kiler jüme küni bashlaydu. Andin wéytnamnimu ziyaret qilidu. Xujintawning bu qétimqi sepiride shimaliy koriye da'iriliri bilen yadro mesilisini muzakire qilidighan - qilmaydighanliqi téxi éniq emes.

Xitay shimaliy koriyining asasliq ittipaqdishi bolup, uni ashliq we énérgiye bilen teminleydu. Dölitidin kemdin kem ayrilidighan shimaliy koriye rehbiri kim jung'il ötken yili aprilda qattiq bixeterlik tedbirliri élin'ghan shara'itta béyjingni ziyaret qilghan idi.

Xitay sahibxanliq qiliwatqan shimaliy koriye yadro kirizisi heqqidiki 4 - ret di'alogta, shimaliy koriye yadro pilanliridin waz kéchishke qoshulghan. Emma arqidinla piyongyang yene yéngi shert qoshup, xelq'aradin bir radi'aktip qazan bérishini telep qilghan idi. Arqidin xitay hökümiti mu'awin bash ministiri wuyi bashchiliqidiki wekiller ömikini shimaliy koriyige ewetken. Ular shimaliy koriye emgekchiler partiyisi qurulghanliqining 60 yilliqini xatirilesh pa'aliyetlirige qatnashqan.

Xitay dölet re'isi xujintawmu mexsus téligiram ewetip, ikki dölet munasiwitini "qimmetlik bayliq" dep teripligen hemde shimaliy koriye diktatori kim jung'ilning rehberlirini maxtap kökke kötürgen. (Arzu)