Хитайдики терилғу йәрләр зор дәриҗидә булғанди

Һазир хитайдики терилғу йәрләрниң булғиниш әһвали интайин еғир болуп, булғиниш дәриҗиси йилдин ‏- йилға изчил һалда өрләп маңған. Хитай һөкүмәт даирилириниң бу һәқтә бәргән мәлуматида ейтилишичә, һазир хитайдики булғанған терилғу йәрләр тәхминән 150 милйон моға йәткән болуп, бу хитайдики омумий терилғу йәрниң 10 дин бир қисмини игилигән.

Хәвәрдә көрситилишичә, булғанған терилғу йәрләрниң хитай иқтисадиға елип кәлгән зийини интайин зор болған. Пәрәзләргә қариғанда, хитайда һәр йили еғир митал түпәйли булғанған ашлиқниң өзи 12 милйон тонна болуп, буниңдин келип чиққан иқтисадий зиян 20 милярд йүәндин ашқан.

Буниңдин башқа йәнә ,йеза игилик мәһсулатлирида булғанған тупрақ түпәйлидин келип чиққан зәһәрлик маддилар мәвҗут болғанлиқтин, уни истимал қиливатқан кишиләр арисида, түрлүк кесәлликләр пәйда болуп, хәлқниң тән- саламәтликигә зор зиян елип кәлгән.

Әнгилийә б б с радио ‏- телевизийә ширкитиниң хәвәрләр тор бетидә берилгән мәлуматта ейтилишичә, 90 ‏- йиллардин тартип та һазирғичә,хитай тәхминән 15 милйон гектардин артуқ терилғу йеридин айрилған. Бундақ болуштики сәвәб:хитайдики терилғу йәрләрниң көп қисми асасий қурулуш вә шәһәрләштүрүш ишлириға ишлитилгәнликтин икән.

Радиомизниң һәқсиз ленийисигә келиватқан телефонлардин мәлум болушичә, һазир уйғур елидики терилғу йәрләрму йилдин -йилға азайған вә булғанған. Йеқинда,радиомизниң зияритини қобул қилған қәшқәр райониниң мәлум бир йезисидики уйғур деһқанниң мәлум қилишичә, һазир мәзкур җайда, көчмән хитайларниң көпийиши түпәйлидин, уйғур деһқанлири арисида, өз терилғу йәрлиридин айрилип қеливатқан уйғур деһқанлири барғансери көпәйгән. (Миһрибан)