Олимпик ахбарат мәркизи меһманханиси өзини махтиғанларға мукапат бәрмәкчи

Бейҗиң шәһиригә җайлашқан гехва йеңи әсир меһманханиси өзини махтап хәвәр бәргән мухбирларға мукапат беридиғанлиқини елан қилған болуп, ройтерста көрситилишичә, бу һәқтики тәшвиқат вариқи өткән җүмә күни мәзкур меһманханида ечилған бейҗиң олимпик тәшкилләш комитетиниң ахбарат елан қилиш йиғинда тарқитилған.
Мухбиримиз җүмә хәвири
2008.06.23

 Мәлум болишчә, меһманханиниң иҗтимаий мунасивәтләр бөлүми тәрипидин тарқалған тәшвиқат вариқида йәнә, мәзкур меһманхана һәққидә 500 хәтлик иҗабий хәвәр бәргән мухбирға 500 йүән, 500 дин миң хәт әтрапидики мақалиға бир миң йүән мукапат беридиғанлиқи уқтурулған.

Ройтерста нәқил елип көрситишичә, меһманхана иҗтимаий мунасивәтләр бөлүминиң директори җав шявда олимпиктин пайдилинип өзиниң намини кеңәйтиш вә өз меһманханисиниң маркисини тонуштуруш мәқситидә шундақ қилғанлиқини билдүргән.

Хитайда органларниң өзи һәққидә иҗабий хәвәр елан қилғузуш үчүн мухбирларға яки ахбарат органлириға пара бериш кәң учрайдиған әһвал болуп, бу хәлқара мухбирлар һоқуқини қоғдиғучи вә мухбирлар әхлақини тәрғип қилғучи тәшкилатларниң изчил тәнқид қилишиға учрап кәлмәктә.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.