Xitay saqchiliri Uyghur élide yer asti xristi'an étiqadchilar jama'itini qolgha aldi

Rojdéstwo bayrimi küni xitay saqchiliri Uyghur élidiki bir qanche yer asti xristi'an étiqadchilar jama'iti yighilishigha tuyuqsiz basturup kirip, 12 neper xristi'an muritini qolgha aldi.

Amérikidiki "xitaygha yardem oyushmisi" ning melum qilishiche, 200 ge yéqin saqchi we diniy ishlar idarisining xadimi 25‏- dékabir rojdistwa bayrimi küni Uyghur éli sanji tunggan aptonom oblastining manas nahiyisidiki bir yer asti xristi'an étiqadchilar jama'iti yighilishigha bésip kirgen. Bu yerde 210 neper xiristi'an muriti bayramni tebriklesh pa'aliyiti élip bériwatqan iken.

Saqchilar bu yerdiki 12 neper diniy rehberni qolgha élishtin sirt yene, bu chérkawgha tewe 2 mashina, bir pi'ano, bir dane télékamira, 80 dane injil qatarliq nersilernimu qoshup musadire qilghan. "Xitaygha yardem oyushmisi" ning diréktori fu shchyu bu weqege shahid bolghan bir kishi bilen söhbetleshken bolup, uning éytishiche, saqchilarning ularning bu pa'aliyitini "qanunsiz diniy yighilish" dep eyibligen.

Manas nahiyilik saqchi da'irilirining fransiye agéntliqigha melum qilishiche, ular etisi 7 kishini qoyup bergen, qalghan 5 i yenila tutup turulmaqta iken. Bu weqedin sirt xitay saqchiliri yene, rojdéstwo bayrimining harpa küni korlidiki bir yer asti xristi'an étiqadchilar jama'iti yighilishighimu bösüp kirgen. (Peride)