Хитай баш министири вен җябав, йеза тәрәққиятиға мәбләғ селишни күчәйтишкә вәдә бәрди

• 
  2006-03-06

Хитай баш министири вен җябав, йәкшәнбә күни башланған хитай хәлқ қурултийиниң мәмликәтлик йиғинида һөкүмәт хизмитидин доклат берип, йеза тәрәққиятиға селинидиған мәбләғниң бу йил 15 % көпәйтилидиғанлиқини билдүрди. Йеза - кәнтләр мәсилиси хитай бойичә мәмликәт характерлик иҗтимаий муқимсизлиқ мәсилиси болуп қалмақта.

Вен җябав, бу йил хитай иқтисади тәрәққият сүритиниң 8 % гә астилайдиғанлиқини әскәртти. У, тәйвән мәсилисини тилға алғанда тәйвән билән сөһбәт елип баридиғанлиқини , әмма демократик йол билән сайланған тәйвән рәһбәрлириниң мустәқиллиқ йолиға меңишиға сүкүт қилип турмайдиғанлиқини җакарлиған. Вен җябав, " тәйвән мустәқиллиқини нишан қилған бөлгүнчи һәрикәтләргә қәти қарши туримиз " дәйду. Хитай даирилири тәйвән мустәқиллиқи икки қирғақ арисида уруш кәлтүрүп чиқиридиған " хәтәрлик қәдәм " дәп агаһландурмақта.

Вен җябав, бу йилқи дөләт хам чоти һәққидә тохтилип, мәктәпләр, йеза игилик ярдими, саламәтлик вә асасий қурулушқа селинидиған мәбләғ " йезиларниң қияпитидә тез вә зор өзгиришләр пәйда қилиду " деди. Әмма у шуниң билән биргә һәрбий хам чотни 7. 14 Пирсәнт ашурғанлиқини оттуриға қойған. Униң әскәртишичә, йеза тәрәққиятиға селинидиған мәбләғ 41 милярд 900 милйон доллар болуп, өткән йилға қариған 5 милярд 200 милйон доллар ашурулған. Әмма у доклатида йеза - кәнтләрдә деһқанларниң терилғу йәр вә қора җайлирини мәҗбури сетивелиш кәлтүрүп чиқарған йәр - земин маҗиралири һәққидә тохталмиди.

Қурултай башланған күни хитай даирилири тйәнәнмин мәйданида бихәтәрлик тәдбирлирини алаһидә күчәйткән. Бирләшмә ахбарат агентлиқи, бихәтәрликни қоғдашқа 15миң сақчиниң сәпәрвәр қилинғанлиқини хәвәр қилди. (Әркин)