Xitay bash ministiri wén jyabaw, yéza tereqqiyatigha meblegh sélishni kücheytishke wede berdi

• 
  2006-03-06

Xitay bash ministiri wén jyabaw, yekshenbe küni bashlan'ghan xitay xelq qurultiyining memliketlik yighinida hökümet xizmitidin doklat bérip, yéza tereqqiyatigha sélinidighan mebleghning bu yil 15 % köpeytilidighanliqini bildürdi. Yéza - kentler mesilisi xitay boyiche memliket xaraktérlik ijtima'iy muqimsizliq mesilisi bolup qalmaqta.

Wén jyabaw, bu yil xitay iqtisadi tereqqiyat sür'itining 8 % ge astilaydighanliqini eskertti. U, teywen mesilisini tilgha alghanda teywen bilen söhbet élip baridighanliqini , emma démokratik yol bilen saylan'ghan teywen rehberlirining musteqilliq yoligha méngishigha süküt qilip turmaydighanliqini jakarlighan. Wén jyabaw, " teywen musteqilliqini nishan qilghan bölgünchi heriketlerge qet'i qarshi turimiz " deydu. Xitay da'iriliri teywen musteqilliqi ikki qirghaq arisida urush keltürüp chiqiridighan " xeterlik qedem " dep agahlandurmaqta.

Wén jyabaw, bu yilqi dölet xam choti heqqide toxtilip, mektepler, yéza igilik yardimi, salametlik we asasiy qurulushqa sélinidighan meblegh " yézilarning qiyapitide téz we zor özgirishler peyda qilidu " dédi. Emma u shuning bilen birge herbiy xam chotni 7. 14 Pirsent ashurghanliqini otturigha qoyghan. Uning eskertishiche, yéza tereqqiyatigha sélinidighan meblegh 41 milyard 900 milyon dollar bolup, ötken yilgha qarighan 5 milyard 200 milyon dollar ashurulghan. Emma u doklatida yéza - kentlerde déhqanlarning térilghu yer we qora jaylirini mejburi sétiwélish keltürüp chiqarghan yer - zémin majiraliri heqqide toxtalmidi.

Qurultay bashlan'ghan küni xitay da'iriliri tyen'enmin meydanida bixeterlik tedbirlirini alahide kücheytken. Birleshme axbarat agéntliqi, bixeterlikni qoghdashqa 15ming saqchining seperwer qilin'ghanliqini xewer qildi. (Erkin)