"Xiyalimdiki sherqiy türkistan" namliq resim sizish musabiqisining mukapat tarqitish murasimi ötküzüldi

Ixtiyariy muxbirimiz erkin tarim
2021-06-25
Share
"Xiyalimdiki sherqiy türkistan" témisidiki resim sizish musabiqisining mukapat tarqitish murasimida "Iyi" partiyesi re'isi meral aqshener xanim söz qilmaqta. 2021-Yili iyun, türkiye.
RFA/Erkin Tarim

"Xiyalimdiki sherqiy türkistan" témisidiki resim sizish musabiqisining mukapat tarqitish murasimida söz qilghan "Iyi" partiyesi re'isi meral aqshener xanim sherqiy türkistan mesilisining öz partiyesining eng muhim mesilisi ikenlikini, bu qétim mukapatqa érishken resimlerning türkiyening her qaysiy jaylirida körgezme qilinidighanliqini tekitlidi.

Xitayning Uyghurlargha qarita "Irqiy qirghinchiliq" yürgüzgenliki amérika hökümiti bashta bolup 7 dölet parlaménti teripidin birdek békitilgen bir peytte, türkiye ma'arip ministirliqi 5-ayning 3-küni ottura mektep oqughuchiliri arisida "Xiyalimdiki xitay" témisida resim sizish musabiqisi bashlatqan idi. Bu pa'aliyet türkiyede qattiq naraziliqqa uchrighanidi.

Türkiyediki "Iyi" partiyesi buninggha qarshi 5-ayning 19-küni, yeni türkiye yashlar bayrimi küni "Xiyalimdiki sherqiy türkistan" témisida resim sizish musabiqisi bashlan'ghanliqini jakarlidi. Mezkur musabiqige türkiye boyiche bashlan'ghuch, ottura we toluq ottura mektep oqughuchiliri ishtirak qilghan bolup, bu resimler bahalinip, mukapatqa érishkenlerge mukapat tarqitildi. Ularning resimliridin tallan'ghan resim körgezmisi 23-iyun küni daghdughiliq échildi. "Iyi" partiyesi merkizidiki zalda échilghan körgezmige partiye re'isi meral aqshener xanim, mu'awin re'isler, partiye rehberliri, mukapatqa érishkenler we dunya Uyghur qurultiyi rehberliri hemde sherqiy türkistan ammiwiy teshkilatliri mes'ulliridin bolup köp sanda kishi qatnashti. Meral aqshener xanim güldiras alqish sadaliri ichide resim körgezmisining léntisini keskendin kéyin murasim bashlandi.

Serwet sapar hali xanim riyasetchilik qilghan bu yighin mundaq bashlandi: "Partiyemizning türk dunyasi we chet eldiki türkler bashqarmisi uyushturghan 'xiyalimdiki sherqiy türkistan' namliq resim sizish körgezmisining mukapat tarqitish murasimi' we resim körgezmimizning échilish murasimigha xush kélipsiler. Aldi bilen bu pa'aliyetni uyushturghan mu'awin re'isimiz yawuz aghirali'oghlini sözge teklip qilimiz."

U sherqiy türkistan dewasining partiyesining muhim dewaliridin biri ikenlikini tekitlep, mundaq dédi: "Sherqiy türkistan mesilisi partiyemizning eng muhim mesilisidur. Biz parlaméntta, téléwiziyelerde we qolimizgha keltürgen her pursette sherqiy türkistan mesilisini küntertipke élip kélishke tirishiwatimiz, bundin kéyinmu shundaq qilimiz. Bu resim musabiqisi arqiliq yash-ösmürlirimizning qelbidiki sherqiy türkistanni resim arqiliq ekis ettürüshni meqset qilduq. Sebiy balilarning qelbige xiyalidiki sherqiy türkistanni neqish qilmaqchimiz."

Yawuz aghirali'oghlu ependi nutuqida bu resim körgezmisini türkiyening hemme yéride achidighanliqini bayan qilip, mundaq dédi: "Partiyemizning re'isigimu déduq, bu resim körgezmisini türkiyening hemme yéride achmaqchimiz. Xudayim buyrisa sherqiy türkistandiki balilar kélechekte türkiyediki 23-aprél balilar bayrimigha kélip qatnishalaydighan künlergimu ige bolidu dep oylaymiz. Ishinimizki, ularmu erkinlikige érishidu."

Arqidin "Iyi" partiyesining re'isi meral aqshener xanim échilish nutuqi sözlep mundaq dédi: "Men 1994-yili tunji qétim xitaygha bardim. U yerdin bir guruppa ayal öz imkanlirimiz bilen sherqiy türkistan'gha barduq. Qeshqer, turpan qatarliq jaylarni aylanduq. U yerlerde yash-ösmürlerni qérilarni körduq. Sherqiy türkistanni ékiskursiye qilish jeryanida, u yerde zulumning barghanséri küchiyiwatqanliqini kördüm, lékin ishghaliyet astida shunche bésim we zulumgha qarimay 'shükür qilip' olturghan kishilerni kördüm. Men ularning kélechikidin, diniy iétiqad we milliy kimlikliridin ensirewatqanliqini hés qilghan idim. Bügünki künde ularning ensireshlirining qanchilik toghra ikenlikini chüshinip yétiwatimen. Biz bundin kéyinmu sherqiy türkistan mesilisini burunqidekla küntertipke élip kélishni dawam qilimiz."

"Xiyalimdiki sherqiy türkistan" témisidiki resim sizish musabiqisigha 300 etrapida kishi resim sizip yollighan bolup, buning ichidin 9 kishi mukapatqan érishken. "Iyi" partiyesining istanbul shöbisidiki mes'ulliridin choqay qochar ependi bu heqte melumat bérip mundaq dédi: "Resim sizish musabiqisigha 300 kishi resim ewetti, buning ichidin 150 resimni lagér qurbanliri bolghan Uyghur ösmürler sizip ewetti. Buning ichidin 9 kishi mukapatqa érishti. Biz mukapatqa érishken Uyghurlarni aptobus bilen enqerege apirip murasimgha qatnashturduq, kéyin türkiyening qurghuchisi mustafa kamal atatürkning xatire sariyini ékiskursiye qildurrup, istanbulgha qayturup kelduq."

Murasim axirlashqandin kéyin "Iyi" partiyesining re'isi meral aqshener xanimning qolidin mukapatni alghan, mezkur musabiqida birinchilikke érishken ekrem obulqasimgha mikrofonimizni uzattuq. U mukapatqa érishkenlikidin intayin xursen bolghanliqini bayan qildi. Ekrem obulqasim ependi özining mukapatqa érishken resimini qisqiche sherhilep ötti.

Bu musabiqige istanbuldin qatniship birinchilikke érishken 8 yashtiki nergize tashmemet, mukapatni "Iyi" partiyesining re'isi meral xanimning qolidin alghanliqi üchün intayin xursen bolghanliqini bayan qildi.

Türkiye ma'arip ministirliqi we xitay elchixanisining qollishi bilen enqerediki xelq'ara ilim we kültür wexpi 2016-yilidin buyan ottura mektep oqughuchiliri arisida "Xiyalimdiki xitay" mawzuluq resim sizish musabiqisi ötküzüp kéliwatqan bolup, bu yilqisi türkiyede qattiq naraziliqqa uchridi. Türkiyening sabiq bash ministiri, "Kélechek" partiyesining re'isi exmet dawut'oghlu bashchiliqida köp sandiki siyasetchiler, ziyaliylar, ammiwi teshkilat mes'ulliri we xelq ammisi türkiyediki ottura mektep oqughuchiliri sizghan "Xiyalimdiki sherqiy türkistan" mawzuluq kök bayraq sizilghan resimlerni tarqatti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet