Xongkong xelqi Uyghurlarni qollap namayish qildi

Muxbirimiz jüme
2019-12-22
Share
Xongkong-Namayish-1222-01.jpg 22-Dékabir xongkongda ötküzülgen xitayning Uyghurlargha qaratqan basturush siyasitige naraziliq bildürüsh namayishidin bir körünüsh. 2019-Yili 22-dékabir. Xongkong.
Social Media

22-Dékabir xongkong xelqi namayish qilip, xitayning Uyghurlargha qaratqan basturush siyasitige naraziliq bildürdi. Xongkong saqchiliri tinch yosunda namayish qiliwatqan amma bilen toqunushti. Xewerlerge qarighanda, shu jay waqti yekshenbe küni chüshtin kéyin mingdin artuq namayishchi xongkongdiki éndinburg meydanida Uyghurlarni qollap tinch yosunda namayish ötküzdi.

Namayishchilar Uyghurlarning ay-yultuzluq kök bayriqi, amérikaning, en'gliyening, teywenning dölet bayraqlirini kötürüshken bolsa, beziliri xitay bayriqi sheklidiki bir qol ay-yultuzluq kök bayraqning éghzini étiwalghan süret chüshürülgen maskilarni taqashqan idi. Namayishchilarning hemmisi dégüdek qara renglik kiyin'gen. Ularning arisida yashlarmu, yashan'ghanlarmu bar bolup, ularning beziliri yene "Uyghurlargha erkinlik, xongkonggha erkinlik", "Qirghinchiliq xitaydiki saxta aptonomiyining mehsuli" dégendek sho'arlar chüshürülgen plakatlarni kötürüwalghan idi.

TRT In'glizche qanilining ziyaritini qobul qilghan bir namayishchi:" biz hemmimiz bir mustebit hakimiyet bilen élishiwatimiz. Shunga biz sherqiy türkistandiki Uyghurlar bilen bir septe. Biz ularning béshigha kelgenlerning bizning béshimizghimu kélishini xalimaymiz" dédi.

Namayish, nutuq sözlesh, jim olturush, sho'ar towlash sheklide dawam qiliwatqanda xongkong saqchilirining zorawanlarche basturushigha uchridi. Saqchilar namayishchilargha much süyi, kaltek-toqmaqlar bilen hujum qildi. Namayishchilarmu saqchilargha shéshe we tash-késeklerni étip keskin qarshiliq körsetti. Köpligen namayishchi tutqun qilindi.

Bu xongkongluqlarning ötken 7 aydin buyan xitaygha qarshi élip bériwatqan keng kölemlik namayishlirining biri bolsimu, emma Uyghurlarni qollap ötküzgen tunji zor namayishi iken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet