Хотәндә йәнә бир бала өстәңгә чүшүп кетип өлгән, ата-анисиниң йиғивелиш лагерида икәнлики пәрәз қилинмақта

Мухбиримиз шөһрәт һошур
2019.06.10
xotende-ostengde-qaza-qilghan-bala.jpg Өткән айда иҗтимаий таратқуларда тарқалған хотәндә өстәңгә чүшүп өлүп кәткән балини тонувелиш һәққидики сүрәтлик елан.
Social Media

Өткән айда иҗтимаий таратқуларда хотәндә өстәңгә чүшүп өлүп кәткән бир балини тонувелиш һәққидә сүрәтлик елан тарқалған иди. Мухбиримизниң бу һәқтә елип барған ениқлашлири давамида балиниң өлүм учуриниң тоғрилиқи дәлилләнди. Әһвалдин қисмән хәвәрдар кишиләр балиниң ата-анисиниң йиғивелиш лагерида икәнликини пәрәз қилишмақта.

Мәзкур сүрәтлик еланда өстәңдин сүзүвелинған балиниң вилайәтлик дохтурханида икәнлики баян қилинған. Мәзкур дохтурханидин телефонимизни қобул қилған бир хадим бу һәқтә мәлумат берәлмиди. Шәһәрлик аяллар бирләшмиси, ана-балилар сақлиқини сақлаш понкити қатарлиқ орунларму бу вәқәдин хәвәрсизликини ейтти.

Хотән шәһәр илчи йезилиқ сақчиханиниң хадими мәзкур вәқәниң растлиқини инкар қилмиди. У пәқәт өзиниң вәқәниң тәпсилатидин хәвәрсизликини ейтти. Биз бу хадимдин өстәңгә чүшүп кәткән балиниң исми, йеши вә ата-анисиниң қайси лагерда икәнликини сориғинимизда у бу вәқә һәққидә ибраһим исимлик бир сақчиниң мәлумати барлиқини ейтти. Әмма сақчи ибраһим телефонимизни қобул қилмиди. 

Өстәңгә чүшүп кәткән бала һәққидики сүрәтлик еланда балиниң султаним мазарлиқи йенидики бир өстәңдин сүзивелинғанлиқи қәйт қилинған. Әһвалдин хәвәрдар кишиләрдин бири мәзкур балиниң ата-анисиниң тепилғанлиқи, уларниң хотән шәһәр навағ йеза, султаним мәһәллиси 3-аһалиләр комитетиға нопуслуқ икәнликини ашкарилиди. Әмма балиниң ата-анисиниң конкрет әһвали, җүмлидин бала өстәңгә чүшүп кәткәндә қәйәрдә икәнлики һәққидә мәлумат берәлмиди. 

Өткән йили иҗтимаий таратқуларда гума наһийисидә 8 яшлиқ әсма әхмәтниң үстигә қайнақсу төкүвелип өлгәнлики, икки яшлиқ рәхмитулла ширбақиниң болса өстәңгә чүшүп кетип музлап өлгәнлики ашкариланған иди. Ениқлашлиримиз давамида бу һәр икки балиниң ата-аниси лагерда икәнликини дәлилләнгән иди. Муһаҗирәттики уйғур паалийәтчиләр мана бу вәқәләргә, болупму хотәндә көп санда кишиләрниң лагерда икәнликидәк реаллиққа асасән бу қетим султаним мәһәллисидә суға чүшүп өлгән балиниң ата-анисиниңму лагерда икәнликини пәрәз қилишмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.