Xotende yene bir bala östengge chüshüp kétip ölgen, ata-anisining yighiwélish lagérida ikenliki perez qilinmaqta

Muxbirimiz shöhret hoshur
2019-06-10
Élxet
Pikir
Share
Print
Ötken ayda ijtima'iy taratqularda tarqalghan xotende östengge chüshüp ölüp ketken balini tonuwélish heqqidiki süretlik élan.
Ötken ayda ijtima'iy taratqularda tarqalghan xotende östengge chüshüp ölüp ketken balini tonuwélish heqqidiki süretlik élan.
Social Media

Ötken ayda ijtima'iy taratqularda xotende östengge chüshüp ölüp ketken bir balini tonuwélish heqqide süretlik élan tarqalghan idi. Muxbirimizning bu heqte élip barghan éniqlashliri dawamida balining ölüm uchurining toghriliqi delillendi. Ehwaldin qismen xewerdar kishiler balining ata-anisining yighiwélish lagérida ikenlikini perez qilishmaqta.

Mezkur süretlik élanda östengdin süzüwélin'ghan balining wilayetlik doxturxanida ikenliki bayan qilin'ghan. Mezkur doxturxanidin téléfonimizni qobul qilghan bir xadim bu heqte melumat bérelmidi. Sheherlik ayallar birleshmisi, ana-balilar saqliqini saqlash ponkiti qatarliq orunlarmu bu weqedin xewersizlikini éytti.

Xoten sheher ilchi yéziliq saqchixanining xadimi mezkur weqening rastliqini inkar qilmidi. U peqet özining weqening tepsilatidin xewersizlikini éytti. Biz bu xadimdin östengge chüshüp ketken balining ismi, yéshi we ata-anisining qaysi lagérda ikenlikini sorighinimizda u bu weqe heqqide ibrahim isimlik bir saqchining melumati barliqini éytti. Emma saqchi ibrahim téléfonimizni qobul qilmidi. 

Östengge chüshüp ketken bala heqqidiki süretlik élanda balining sultanim mazarliqi yénidiki bir östengdin süziwélin'ghanliqi qeyt qilin'ghan. Ehwaldin xewerdar kishilerdin biri mezkur balining ata-anisining tépilghanliqi, ularning xoten sheher nawagh yéza, sultanim mehellisi 3-ahaliler komitétigha nopusluq ikenlikini ashkarilidi. Emma balining ata-anisining konkrét ehwali, jümlidin bala östengge chüshüp ketkende qeyerde ikenliki heqqide melumat bérelmidi. 

Ötken yili ijtima'iy taratqularda guma nahiyiside 8 yashliq esma exmetning üstige qaynaqsu töküwélip ölgenliki, ikki yashliq rexmitulla shirbaqining bolsa östengge chüshüp kétip muzlap ölgenliki ashkarilan'ghan idi. Éniqlashlirimiz dawamida bu her ikki balining ata-anisi lagérda ikenlikini delillen'gen idi. Muhajirettiki Uyghur pa'aliyetchiler mana bu weqelerge, bolupmu xotende köp sanda kishilerning lagérda ikenlikidek ré'alliqqa asasen bu qétim sultanim mehelliside sugha chüshüp ölgen balining ata-anisiningmu lagérda ikenlikini perez qilishmaqta.

Toluq bet