Японийәниң йәрлик парламент әзалириға лагерлардики уйғурларниң әһвали аңлитилди

Мухбиримиз меһрибан
2020-03-19
Елхәт
Пикир
Share
Принт
японийә уйғур җәмийитиниң токйодики японийә парламент бинасида японийә йәрлик парламент әзалири билән өткүзгән йиғиндин кейинки хатирә сүрәт. 2020-Йили 18-март.
Японийә уйғур җәмийитиниң токйодики японийә парламент бинасида японийә йәрлик парламент әзалири билән өткүзгән йиғиндин кейинки хатирә сүрәт. 2020-Йили 18-март.
Photo: RFA

Японийә уйғур җәмийити иҗраийә һәйитиниң рәиси халмәт розахун әпәнди 19-март күни радийомиз зияритини қобул қилип, японийә пайтәхти токйода өткүзүлгән йәрлик парламент әзалири билән учришиш йиғини һәққидә мәлумат бәрди. Униң баян қилишичә, бу учришиш 18-март күни токйодики японийә парламент бинасида өткүзүлгән икән.

Халмәт әпәндиниң билдүрүшичә, 3-айниң 18-күни японийә уйғур җәмийитиниң муавин рәиси ғәйрәт кәнҗи әпәнди башчилиқидики японийә уйғур җәмийитиниң вәкиллири японийә йәрлик парламент әзалири бирләшмисиниң мәсуллириға нөвәттики уйғур мәсилиси тоғрисида доклат бәргән.

Халмәт әпәндиниң илгири сүрүшичә, бу қетимқи учришишни японийә йәрлик парламент әзалири бирләшмиси билән японийә уйғур җәмийити бирликтә уюштурған икән. Йиғинда японийә уйғур җәмийитидин әхмәтҗан летип әпәнди мәхсус уйғурлар вәзийити һәққидә доклат бәргән.

Йиғин мәйданидин тартилған син көрүнүшидин мәлум болушичә, йиғин башқурғучиси номура әпәнди алди билән нөвәттики уйғур вәзийити һәққидә қисқичә чүшәнчә берип өткән. У сөзидә нөвәттә пүтүн дуняниң диққити корона вирусиға мәркәзләшкән бир вәзийәттә хитай лагерлириға қамалған уйғурлар мәсилиси нәзәрдин ташлинип қалған. Шуңа у сөзидә хитай лагерлиридики милйонлиған уйғур тутқунлар мәсилиси вә униң җиддийликини тәкитлигән. Шундақла дуняниң хитай лагерлиридики уйғур тутқунлар мәсилисигә җиддий диққәт қилишиниң зөрүрлүкини әскәртип өткән.

Бу қетимлиқ йиғинда японийә йәрлик парламент әзалири бирләшмисиниң рәиси маруяма әпәндиму уйғурлар вәзийити һәққидә сөз қилған.

Маруяма әпәнди сөзидә хитайда йиллардин буян давамлишип келиватқан адәм ички әзалири әткәсчиликиниң йеқинда техиму бәк әвҗгә чиққанлиқини, лагерларға қамалған бигунаһ уйғур мәһбуслириниң бу җинайи қилмишларниң асаслиқ қурбаниға айлиниватқанлиқини илгири сүргән. У бу җинайи қилмишларни тохтитиш, лагер мәһбуслирини қутқузуш үчүн техиму көп кишиләрниң аваз қошуши лазимлиқини, бу җәрянда японийәдики һәрқайси наһийә, шәһәрләрниң парламент әзалириниң муһим рол ойниши лазимлиқини оттуриға қойған.

Японийә уйғур җәмийити иҗраийә һәйитиниң рәиси халмәт әпәндиниң билдүрүшичә, йиғинда йәнә японийә уйғур җәмийитиниң муавин рәиси ғәйрәт кәнҗи әпәнди билән абдукерим әпәнди қатарлиқ японийә уйғур җәмийитиниң башқа әзалириму сөз қилған. Улар нөвәттики уйғур вәзийитидики әң җиддий дәп қаралған мәсилиләр тоғрисида пикир баян қилған.

Ғәйрәт кәнҗи әпәнди сөзидә паалийәткә кәлгән парламент әзалириға рәһмәт ейтқан. У йәнә японийә парламент әзалирини бундин кейин японийәдә уйғурлар тоғрилиқ өткүзүлидиған һәр түрлүк паалийәтләргә йеқиндин ярдәмдә болушқа чақирған.

Мәлум болушичә, японийә уйғур җәмийити японийә парламент әзалири билән болған алақини барғанчә күчәйтишкә җиддий етибар бәрмәктикән. Улар йеқиндин буян уйғурлар тоғрилиқ һәр хил йиғин вә учришиш паалийәтлирини көпләп уюштурған.

Халмәт әпәндиниң билдүрүшичә, әсли пиланда бу һәптә ичидә японийә парламент әзалири билән дуня уйғур қурултийиниң рәиси долқун әйса әпәндиниң учришиши һәққидә бирқанчә пилан-программилар орунлаштурулған икән. Әмма хитайдин тарқалған корона вируси юқумиға қарши елинған тәдбирләр сәвәблик илгирики бәзи пиланлар әмәлдин қалдурулған яки кечиктүрүлгән икән.

Пикирләр (0)
Share
Толуқ бәт