Yaponiyening yerlik parlamént ezalirigha lagérlardiki Uyghurlarning ehwali anglitildi

Muxbirimiz méhriban
2020-03-19
Élxet
Pikir
Share
Print
Yaponiye Uyghur jem'iyitining tokyodiki yaponiye parlamént binasida yaponiye yerlik parlamént ezaliri bilen ötküzgen yighindin kéyinki xatire süret. 2020-Yili 18-mart.
Yaponiye Uyghur jem'iyitining tokyodiki yaponiye parlamént binasida yaponiye yerlik parlamént ezaliri bilen ötküzgen yighindin kéyinki xatire süret. 2020-Yili 18-mart.
Photo: RFA

Yaponiye Uyghur jem'iyiti ijra'iye hey'itining re'isi xalmet rozaxun ependi 19-mart küni radiyomiz ziyaritini qobul qilip, yaponiye paytexti tokyoda ötküzülgen yerlik parlamént ezaliri bilen uchrishish yighini heqqide melumat berdi. Uning bayan qilishiche, bu uchrishish 18-mart küni tokyodiki yaponiye parlamént binasida ötküzülgen iken.

Xalmet ependining bildürüshiche, 3-ayning 18-küni yaponiye Uyghur jem'iyitining mu'awin re'isi gheyret kenji ependi bashchiliqidiki yaponiye Uyghur jem'iyitining wekilliri yaponiye yerlik parlamént ezaliri birleshmisining mes'ullirigha nöwettiki Uyghur mesilisi toghrisida doklat bergen.

Xalmet ependining ilgiri sürüshiche, bu qétimqi uchrishishni yaponiye yerlik parlamént ezaliri birleshmisi bilen yaponiye Uyghur jem'iyiti birlikte uyushturghan iken. Yighinda yaponiye Uyghur jem'iyitidin exmetjan létip ependi mexsus Uyghurlar weziyiti heqqide doklat bergen.

Yighin meydanidin tartilghan sin körünüshidin melum bolushiche, yighin bashqurghuchisi nomura ependi aldi bilen nöwettiki Uyghur weziyiti heqqide qisqiche chüshenche bérip ötken. U sözide nöwette pütün dunyaning diqqiti korona wirusigha merkezleshken bir weziyette xitay lagérlirigha qamalghan Uyghurlar mesilisi nezerdin tashlinip qalghan. Shunga u sözide xitay lagérliridiki milyonlighan Uyghur tutqunlar mesilisi we uning jiddiylikini tekitligen. Shundaqla dunyaning xitay lagérliridiki Uyghur tutqunlar mesilisige jiddiy diqqet qilishining zörürlükini eskertip ötken.

Bu qétimliq yighinda yaponiye yerlik parlamént ezaliri birleshmisining re'isi maruyama ependimu Uyghurlar weziyiti heqqide söz qilghan.

Maruyama ependi sözide xitayda yillardin buyan dawamliship kéliwatqan adem ichki ezaliri etkeschilikining yéqinda téximu bek ewjge chiqqanliqini, lagérlargha qamalghan bigunah Uyghur mehbuslirining bu jinayi qilmishlarning asasliq qurbanigha ayliniwatqanliqini ilgiri sürgen. U bu jinayi qilmishlarni toxtitish, lagér mehbuslirini qutquzush üchün téximu köp kishilerning awaz qoshushi lazimliqini, bu jeryanda yaponiyediki herqaysi nahiye, sheherlerning parlamént ezalirining muhim rol oynishi lazimliqini otturigha qoyghan.

Yaponiye Uyghur jem'iyiti ijra'iye hey'itining re'isi xalmet ependining bildürüshiche, yighinda yene yaponiye Uyghur jem'iyitining mu'awin re'isi gheyret kenji ependi bilen abdukérim ependi qatarliq yaponiye Uyghur jem'iyitining bashqa ezalirimu söz qilghan. Ular nöwettiki Uyghur weziyitidiki eng jiddiy dep qaralghan mesililer toghrisida pikir bayan qilghan.

Gheyret kenji ependi sözide pa'aliyetke kelgen parlamént ezalirigha rehmet éytqan. U yene yaponiye parlamént ezalirini bundin kéyin yaponiyede Uyghurlar toghriliq ötküzülidighan her türlük pa'aliyetlerge yéqindin yardemde bolushqa chaqirghan.

Melum bolushiche, yaponiye Uyghur jem'iyiti yaponiye parlamént ezaliri bilen bolghan alaqini barghanche kücheytishke jiddiy étibar bermektiken. Ular yéqindin buyan Uyghurlar toghriliq her xil yighin we uchrishish pa'aliyetlirini köplep uyushturghan.

Xalmet ependining bildürüshiche, esli pilanda bu hepte ichide yaponiye parlamént ezaliri bilen dunya Uyghur qurultiyining re'isi dolqun eysa ependining uchrishishi heqqide birqanche pilan-programmilar orunlashturulghan iken. Emma xitaydin tarqalghan korona wirusi yuqumigha qarshi élin'ghan tedbirler seweblik ilgiriki bezi pilanlar emeldin qaldurulghan yaki kéchiktürülgen iken.

Toluq bet